La Universidá d'Uviéu foi una de les instituciones que collaboraron na ellaboración de la obra "The vegetation of the Iberian Peninsula", qu'apurre la más completa descripción, actualizada y detallada, de la vexetación de la península Ibérica. Escrita por más de 60 investigadores d'España y Portugal, y editada por Javier Loidi, de la Universidá del País Vascu, consta de dos volumes qu'inclúin una primer sección con capítulos xenerales sobro'l clima, la biogeografía y la flora, y xuna segunda sección con descripciones detallaes de los catorce sectores rexonales nos que s'estremó la Península y les Isles Baleares.

 

Xuna tercer sección esquiza característiques especiales, como ye la vexetación acuática, la de los yelsos o la vexetación dolomítica, afondando na vexetación costera, la flora y vexetación de monte, según los problemes de caltenimientu y flora exótica invasora. "The vegetation of the Iberian Peninsula" inclúi numberoses fotografíes y xuna variada cartografía bioclimática y biogeográfica, hasta l'actualidá inédita. La ellaboración de la obra llevó más de trés años, magar la conocencia y los datos apurríos son el frutu d'investigaciones qu'en dellos casos empecipiáronse va trés décades.

 

El catedráticu de Botánica de la Universidá d'Uviéu, Tomás Emilio Díaz, ye coautor de trés capítulos. Dos d'ellos son la base fundamental na interpretación de los ecosistemes vexetales qu'esisten na Península Ibérica y nes isles Baleares,  ente que'l terceru estudia la distribución de los seres vivos a lo llargo del mundu, estremando tantu grandes unidaes como pequenos distritos biogeográficos.

 

Nel casu d'Asturies, lo más novedoso de la obra son les unidaes a nivel de distritu, les más pequenes, y la delimitación precisa de los pisos bioclimáticos coles sos comunidaes vexetales o ecosistemes particulares. Na nuesa comunidá autónoma hai distintos picos bioclimáticos, dende'l nivel del mar (pisu termotemplado o termocolino), el mesotemplado o colino, el supratemplado o montano, el orotemplado o subalpino y el criorotemplado o alpín, caracterizaos por unos índices que dexen saber cuál sería la vexetación potencial d'esa zona, con valor predictivu, en función del clima y el sustrato.

 

No que se refier a l'aplicación, cuando se precisa revegetar árees degradaes poles infraestructures o pol abandonu de zones industriales, los mapes dexen saber qué rede vexetal d'árboles, parrotales o yerbas son les más aparentes pa caltener l'equilibriu del mediu ambiente.