El Claustru altu del Edificiu Históricu de la Universidá acueye hasta'l 12 d'avientu la esposición "La cartelería política soviética na so evolución 1917-1980", una amuesa de 183 reproducciones de cartelos que tán curiaos fundamentalmente na Biblioteca estatal de Moscú, realizaos en bona parte por aciu el sistema de litografía o cromolitografía (a dellos colores), y tamién dalgunos en grabáu, y qu'amás del so interés artísticu resulten pervalibles para entender meyor el periodu históricu al que pertenecen.

 

El vicerrector d'Estensión Universitaria y Proyección Internacional, Francisco José Borge, señaló nel actu inaugural que "lo que tamos viendo ye arte, con un claru componente políticu, pero arte que quier dialogar con cada persona que la contempla. Al acoyer una esposición d'esti tipu actuamos como caxa de resonancia de lo que realmente se tán cultivando, ta urdiéndose, y tolos finxos, sían del signu que sían, ideolóxicu, cultural, científicu, tienen cabida na Universidá, porque la Universidá ta abierta a toes, y a toos, y a tou, siempres que s'enfoque dende'l puntu de vista educativu".

 

Francisco Borge inauguró la esposición acompañáu por María del Mar Díaz, profesora titular d'Hestoria del Arte de la Universidá d'Uviéu; Tatiana Kotova, llicenciada n'Hestoria del Arte; y José Enrique Fernández, responsable de la esposición y secretariu de comunicación del PCA.        

 

La profesora María del Mar Díaz esplicó que "la mayor parte de los cartelos siguen una llínea figurativa, anque non toos son figurativos nel sentíu estéticu del realismu socialista, porque hai figuraciones de diversu signu, por casu naturalista, ya inclusive cartelos de los años setenta nos que se repara la influencia d'artistes occidentales como Picasso".

 

Tatiana Kotova llevó a cabu una panorámica del cartelu políticu soviéticu, que la so misión yera "impactar na conciencia de les persones y educar a les mases, con un llinguaxe claru, simple y llenu de fuerza". Pela so parte, José Enrique Fernández afirmó que "lo que güei inauguramos ye una esposición de cartelos diseñaos por decenes d'obreros del arte".

 

L'amuesa, que puede visitase de llunes a vienres de 9 a 21 hores, y los sábados de 9 a 13 hores, ta entamada pola Universidá en collaboración con Espaciu 2017 Asturies y la Fundación Isidoro Acevedo, nel centenariu de la Revolución soviética.