La Universidá d'Uviéu y l'Institutu de Censores Xuraos de Cuentes d'España (ICJCE) roblaron un conveniu para la promoción d'actividaes docentes ya investigadores rellacionaes cola contabilidá y l'auditoría. La Universidá alcordó col ICJCE, que ye la Corporación de Derechu Públicu representativa d'Auditores de Cuentes españoles y Sociedaes d'Auditoría constituyíes legalmente n'España, un marcu de cooperación para potenciar la formación, la investigación y l'espardimientu de les figures d'auditor y auditora de cuentes y d'espertu y esperta contable.

 

Nel actu de presentación, celebráu güei na Sala de prensa del Edificiu Históricu, intervinieron el rector, Santiago García Granda; el presidente del ICJCE, Faustino González-Cueva Fernández; el director del Departamentu de Contabilidá, José Antonio Pérez Méndez; y la coordinadora del Máster Universitariu en Sistemes d'Información y Analís Contable (SIAC), Inés Rubín Fernández.

 

En concretu, el ICJCE, al traviés de la so Agrupación Territorial novena, refuerza la collaboración cola institución académica cola so participación n'actividaes docentes y práctiques nel SIAC, promovido pol Departamentu de Contabilidá col fin de formar profesionales nos campos de la contabilidá y l'auditoría. El conveniu robláu va favorecer la organización ente dambes partes de conferencies, xornaes y seminarios, al igual que la puesta en marcha d'otres acciones específiques, tollo col fin d'ameyorar la conocencia contable, la formación y la visibilidá de los citaos perfiles profesionales.

 

El personal auditor y espertu contable cuenta con una importante proyección y reconocencia nel mundu profesional. La formación con especialización nes distintes aguaes de la contabilidá resulta relevante pa la meyora de los procesos de toma de decisiones, tanto nel ámbitu priváu como nel públicu, lo que n'última instancia contribúi a un meyor aprovechamientu de los recursos y al bienestar de la sociedá polo xeneral.

 

El Máster Universitariu en Sistemes d'Información y Analís Contable (SIAC) de la Universidá d'Uviéu ufierta un doble itinerariu con marcáu calter profesional y xuna visión eminentemente práctica. El primeru d'ellos, denomináu Contabilidá Cimera, tien por finalidá preparar profesionales espertes y espertos na ellaboración, interpretación y analís de la información contable. Dexa ampliar les conocencies contables básicos llograos nel grau, según desenvolver les habilidaes y actitúes necesaries pal desempeñu de cualquier función que rica del manexu d'información económicu-financiera. El segundu itinerariu, auditoría de cuentes, escuerre formar profesionales capaces de desempeñar los llabores propios del auditor de cuentes, apurriéndo-yos les conocencies, competencies y habilidaes necesarios.

 

Esti máster ta homologado pol Institutu de Contabilidá y Auditoría de Cuentes (ICAC) como programa d'enseñanza teórica d'accesu al Rexistru Oficial d'Auditores de Cuentes (ROAC) y, por tanto, espacha de la realización de la primer fase del exame d'aptitú profesional que se riquir pa ser auditor o auditora. El máster cunta col patrociniu de Liberbank y cola collaboración de profesionales de prestíu y de relevantes entidaes y empreses.

 

La firma del conveniu de collaboración col ICJCE aumenta'l potencial del máster SIAC pa formar profesionales contables d'altu nivel capaces d'encarar los retos futuros de la Contabilidá y de l'Auditoría de Cuentes.