Laura Fernández Santamaría (Mieres, 1986), llicenciada y doctora en Filoloxía Hispánica pola Universidá d'Uviéu, alzóse esta tarde col III Premiu Internacional d'Investigación Lliteraria "Ángel González", que convoca la Cátedra que lleva'l nome del poeta, un galardón que ta dotáu con 6.000 euros y la publicación de la obra. El trabayu, tituláu "Esto que veis equí: l'usu de la llingua coloquial na poesía d'Ángel González", frutu de la tesis doctoral de Fernández Santamaría, defendida'l pasáu mes de xunetu, "enceta dende una sólida base científica l'estudiu minucioso y refecho de les traces del llinguaxe conversacional na obra del poeta", según indicó la directora de la Cátedra, Araceli Iravedra.

 

El xuráu destacó "la orixinalidá, la relevancia y el rigor del estudiu, perbién plantegáu y articuláu; tamién la so alta corrección llingüística y estilística; y, a lo último el maduror y l'habilidá de l'autora para conxugar fontes de bien distinta naturaleza, dende los estudios puramente llingüísticos hasta los estudios teóricos y los hestóricu lliterarios". Nel actu nel que se dio a conocer el fallu tuvo presente'l vicerrector d'Estensión Universitaria y Proyección Internacional, Francisco José Borge.

 

Tal que esplicó Araceli Iravedra, "la investigación refundia interesantes conclusiones, que vienen en parte a ratificar, pero tamién a 'rectificar', delles intuiciones y afirmaciones crítiques llargamente sopelexaes. Amás, propón un métodu que dexa probar de manera rigorosa l'aceptáu coloquialismo de cualesquier poeta llamáu 'coloquial'". 

 

Laura Fernández Santamaría, profesora d'Enseñanza Secundaria Obligatoria, espresó'l so agradecimientu y la so emoción al ver "la reconocencia a una aballadora investigación sobre unu de los grandes poetes en llingua española. Ángel González foi l'autor que m'hai inculcado l'amor pola poesía y col qu'esfruté realizando esti trabayu".

 

La Cátedra Ángel González promueve esti premiu, cola collaboración de la Fundación Banco Sabadell, para incentivar la conocencia y l'espardimientu de la obra del poeta asturianu y de la poesía hispánica de los sieglos XX y XXI. Nel actu d'esta tarde tamién se presentó la edición de la obra ganadora del Premiu'l pasáu añu, del escritor y estudiosu Antonio Rivero Machina, titulada "Posguerra y poesía. Construcciones crítiques y realidá histórica".