Un estudiu realizáu por investigadores del grupu ADIR (Aprendizaxe, Dificultaes, Intelixencia y Rendimientu) de la Facultá de Psicoloxía de la Universidá d'Uviéu, que se publicó na revista Frontiers in Psychology, amuesa que les conductes procrastinadoras, o enclín a aplazar les xeres, en plataformes d'aprendizaxe como Moodle, son un bon predictor del rendimientu académicu.

 

Tantu dende la lliteratura científica como dende'l sentíu común viense consideráu que "dexar pa mañana lo que puedes faer güei" nun ye lo más aconseyable para llograr bones resultancies académiques. Recién pero escasos estudios sollertaron de que'l fenómenu de la procrastinación tien peor pronósticu y consecuencies nos aprendizaxes a distancia y semipresencial (y-learning y b-learning) que nos clásicos formatos presenciales.

 

Les resultancies amosaron que mientres el cursu pueden estrayese evidencies de demoranza na interacción de los alumnos cola plataforma, que traen un rendimientu académicu baxu. Sicasí, cuando se repararon nicios d'una bona xestión del tiempu, el rendimientu non solo foi satisfactoriu, sinón alto. Nesti sentíu, la conducta procrastinadora perfílase como una variable central para ameyorar el procesu d'aprendizaxe y la minería de datos educativos como una disciplina con un enorme potencial para la predicción de la conducta.

 

L'equipu multidisciplinar, formáu por psicólogu ya inxenieros informáticos, encabezáu polos profesores José Carlos Núñez y Robeca Zrezal, tomó como base la interacción cola plataforma Moodle d'una amuesa d'estudiantes universitarios para aplica-y técniques de minería de datos y reparar asina les consecuencies de la procrastinación. El procedimientu dexa estrayer información d'un gran conxuntu de datos. Utiliza l'analís matemáticu para, al traviés de patrones y enclinos qu'esisten nos datos, da-yos una estructura comprensible para'l so usu. De normal, esti patrones non pueden detectase por aciu la esploración tradicional porque les relaciones ente ellos son descomanadamente complexes o porque resulten demasiaos. La técnica emplegada, 'class association rules', nun fuera antes aplicada al estudiu de la procrastinación.

 

Nel estudiu llográronse un total de 111 riegles d'asociación ente la interacción de los estudiantes con Moodle y el so rendimientu académicu, de les cualos trés fueron validaes en dos amueses distintes de datos.

 

Les variables emplegaes nel estudiu, resultantes del procesamientu de los 'logs' de la plataforma Moodle, dexen un nuevu enfoque nel estudiu de la cuestión en plataformes virtuales d'aprendizaxe. El ficheru log dexa recoyer la información ensin interferir col procesu natural de saléu del usuariu, pos la ferramienta permanez latente recoyendo los datos. Hasta la fecha, esti fenómenu yera encetáu como una resultancia, amenorgáu a una xera apurrida fora de fecha o non apurrida. Sicasí, l'analís del rexistru d'interacción dexa conocer meyor el procesu d'ellaboración de les xeres, lo cual abre les víes p'afaer la redolada d'aprendizaxe a les necesidaes del estudiante y tomar midíes p'ayudar al alumnáu en situación de fracasu académicu.

 

Esti estudiu forma parte d'un proyectu más ampliu financiáu pol Ministeriu d'Economía y Competitividá, nel que pretende afondase nel estudiu de la metacognición n'aprendices adultos con y ensin dificultaes del aprendizaxe.

 

Datos del artículu Zrezal,

R., Esteban, M., Sánchez-Santillán, M., & Núñez, J. C. (2017). "Procrastinating Behavior in Computer-Based Learning Environments to Predict Performance: A Case Study in Moodle". Frontiers in Psychology, 8.

 

http://journal.frontiersin.org/article/10.3389/fpsyg.2017.01403/full