El deportista paralímpico foi ayeri protagonista na Universidá d'Uviéu, por cuenta de la conferencia de Javier Sotu, consideráu como'l meyor deportista sordu del sieglu XX pol Comité Olímpicu Español (COE), qu'ostentó dellos récords europeos y mundiales en delles distancies, y atropa nada menos que 27 medayes en campeonatos internacionales. L'actu formaba parte del proyectu "Trainers Paralímpicos", que desenvuelven de forma conxunta Caxa Rural d'Asturies, Seguros RGA y la Fundación ONCE.

 

La conferencia ufiertada na Aula Magna del Edificiu Históricu, col títulu "Afaya la to meta y cuerre escontra ella", tuvo presidida por Santiago García, rector de la Universidá d'Uviéu. Alberto Suárez, subcampeón paralímpico de maratón, representó a la Fundación ONCE, nun actu al que nun faltó José Alberto Álvarez, presidente de la Federación Nacional de Persones con Discapacidá Física, nin Ramón Menéndez de Vigo, responsable de Relaciones Institucionales y RSC de RGA, y Alejandro Díaz, responsable de Marketing de Caxa Rural d'Asturies.

 

El programa "Trainers Paralímpicos" tien como oxetivu tresmitir, al traviés d'eventos como esta conferencia, valores como l'esfuerzu y el trabayu bien fechu, que dexen superar barreres aparentemente insalvables y que poques persones conocen como estos deportistes. Les conferencies qu'imparten afonden n'aspeutos como l'enfotu, la superación y el trabayu n'equipu, que son dalgunes de les claves que-yos dexaron llegar a la élite mundial del deporte paralímpico.