Emilio Martínez Pañeda, doctor pola Universidá d'Uviéu, acaba de convertise nel primer español en recibir el prestixosu Acta Student Award de la Sociedá Americana de Materiales (ASM). El galardón reconoz añalmente'l meyor trabayo lideráu por un doctoráu que foi aceptáu para la so publicación n'Acta Materialia, la revista científica más prestixosa nel campu de la mecánica de materiales.

 

El trabayu premiáu presenta un modelu innovador que dexa predicir con precisión el agrietamiento asistíu pol mediu ambiente en componentes metálicos. L'estudiu podría tener importantes implicaciones nel diseñu d'una gran variedá de componentes estructurales del sector enerxéticu onde la fragilización por hidróxenu y l'escomiu siguen causando fallos catastróficos y llindando l'usu d'aceros d'alta resistencia. Nel trabayu, lideráu pola Universidá d'Uviéu, participaron investigadores de la Universidá Técnica de Dinamarca y l'Universidá de Virginia (EEXX).

 

El premiu consta d'un diploma acreditativu, un cheque de dos mil dólares y el financiamientu p'asistir a la ceremonia d'entrega. El galardón foi apurríu pol presidente de la Sociedá Americana de Materiales y el director del departamentu d'inxeniería de materiales del MIT mientres la ceremonia de reconocencia de los líderes del futuru de la American Society of Materials, que tuvo'l llugar ayeri na ciudá americana de Pittsburgh.

 

Emilio Martínez Pañeda desenvolvió'l so doctoráu nel Departamentu de Construcción ya Inxeniería de Fabricación de la Universidá d'Uviéu. El so trabayu de tesis tuvo supervisáu pola caderalga Cuadonga Betegón y financiáu pol Ministeriu d'Economía y Competitividá español, la Universidá d'Uviéu, el Conseyu d'Investigación de Dinamarca y el centru técnicu de Alcoa na Universidá de Virginia. Na actualidá Emilio Martínez Pañeda trabaya como investigador na Universidá de Cambridge.