El Muséu del Xurásicu d'Asturies (MUJA) ye la see d'un cursu de Xeoloxía que s'imparte nel marcu d'un conveniu de collaboración ente la Universidá d'Uviéu y l'Universidá de Saskatchewan de Canadá. Los participantes na actividá, que se desenvuelve del 2 al 8 de setiembre, visitaron güei l'Edificiu Históricu de la institución docente asturiana, onde fueron recibíos pol rector, Santiago García Granda.

 

Un total d'once estudiantes del centru universitariu canadiense y seis de la universidá asturiana participen nes clases teóriques que se realicen nel Muséu, que se van completar con salíes de campu acompañaos polos profesores de la Universidá de Saskatchewan, Grabiela Mangano y Luis Buatois, y pol equipu científicu del MUJA, Laura Piñuela y José Carlos García-Ramos, a los cantiles de La Griega, de sablera de La Vega, Tereñes, Candás o Antromero, ente otros.

 

Asturies presenta xuna gran diversidá y riqueza xeolóxica, lo que dexa reparar roques de distintes edaes n'un área acutada. Por casu, pueden vese roques del Xurásicu na sablera de La Griega o roques del Devónicu n'El Tranquero en Candás, sobro les que van trabayar, respectivamente, dos de los estudiantes de la Universidá de Saskatchewan pal so trabayu final de carrera.

 

El cursu pretende que l'alumnáu conoza tanto l'aspeutu xeolóxicu como cultural del Principáu, pa lo que se programaron amás visites a les ciudaes d'Uviéu y Xixón, percorríos pol Prerrománicu Asturianu o visites a la Cueva y Centro Pedrete Bustillo en Ribesella.