La Universidá d'Uviéu anueva la so tradicional participación na Feria Internacional d'Amueses d'Asturies (FIDMA) cola programación de delles actividaes nel stand de la institución académica, destinaes a públicos de distintes edaes y en particular a los más nuevos. D'esta manera, al pie de la información relativa a la ufierta docente, diversos talleres infantiles, meses redondes, conferencies, títeres, deporte para mayores y actividaes d'investigación van averar el llabor desenvueltu na universidá a los y les visitantes de la feria.

 

Como principal novedá d'esta edición, amás del cambéu d'allugamientu del stand, al pie de la entrada principal del Palaciu de Congresos, destaca la dedicación del martes 8 d'agostu como Día de la Universidá na FIDMA, xornada na que los miembros de la comunidá universitaria (estudiantáu, Personal Docente ya Investigador y Personal d'Alministración y Servicios) van poder aportar a la cortil de manera gratuita, con solo amosar la so tarxeta universitaria na entrada.

 

La programación del Día de la Universidá, que va cuntar cola presencia del rector, Santiago García Granda, inclúi la conferencia "Los Neandertales d'El Sidrón (Piloña)", a cargu del profesor ya investigador de la Universidá d'Uviéu y director de les escavaciones d'El Sidrón, Marcu de la Rasilla, na Sala Mirador; la presentación oficial del stand y del Día de la institución docente énte los medios de comunicación, a cargu del Rector; y un taller d'equilibristes impartíu por La Bisarma Interesáu, que mientres la FIDMA tamién va impartir los talleres Pintar con movimientu, Circuitos eléctricos, Camisetes con ciencia y Equilibristes.

 

Los actos programaos pola Universidá na esposición internacional van empezar el llunes 7 d'agostu, día en que se va celebrar la presentación del Programa Universitariu de Mayores de la Universidá d'Uviéu (PUMUO). Nel actu va intervenir el vicerrector d'Estensión Universitaria y Proyección Internacional, Francisco José Borge. Pa esa mesma xornada programóse un taller prácticu de yoga pensáu por que puedan participar persones de toles edaes.

 

El xueves 10 d'agostu va tar dedicáu a la presentación de los programes de emprendimiento y talentu de la Universidá, cola intervención de la vicerrectora d'Acción Tresversal y Cooperación cola Empresa, Eugenia Suárez Serrano, que va presentar y va moderar la mesa redonda "El talentu universitario a la palestra". Persones egresadas de la Universidá, con una amplia trayectoria a los sos llombos, van apurrir la so perspectiva al respeutu, según estudiantes que participaron en programes de la institución.

 

El xueves 17 y el vienres 18 va llevar a cabu un espectáculu de títeres científicos na escampada del Pabellón Central, tituláu "Einstein y la máquina cuænta ciencia". Les actividaes de divulgación van siguir el sábadu 19 con trés propuestes del programa "Nueche de el investigadores": "Ciencia bien mini", impartida por Ángel Martínez Nistal, director d'Área de los Servicios Científicu-Técnicos de la Universidá d'Uviéu; "Ciencia artesanal", al cargu de José Manuel Montejo Bernardo, profesor del Departamentu de Ciencies de la Educación de la Universidá; y "El color de la química", que va impartir Alfonso Fernández González, de los Servicios Científicu-Técnicos.