Un total de 39 alumnos españoles y portugueses embarcaron nel buque-escuela Creoula, en Cartaxena, nel marcu de la docena campaña de la Universidá Itinerante de la Mar (UIM), entamada poles universidaes d'Uviéu y Porto y la Escola Naval de Lisboa. El cursu, que s'imparte hasta'l 13 d'agostu, lleva por títulu "Lideralgu y trabayu n'equipu", y va recalar el día 4 en Mallorca, el 8 en Málaga y el 12 en Lisboa.

 

Ente les actividaes previstes atópense la visita al Arsenal de Cartaxena y al Muséu Naval de dicha localidá. En Mallorca, el  grupu va visitar la Estación Naval y el Faru de Porto Pi, el terceru en funcionamientu más antiguu del mundu. A la so llegada a Málaga, van visitar el muséu Casa Natal de Picasso, la Alcazaba y la Catedral. El cursu va concluyir en Lisboa'l 13 d'agostu.

 

Los estudiantes pertenecen a distintes disciplines y universidaes (Uviéu, Salamanca, Burgos, Vigo). El cursu cunta col patrociniu de la Fundación Alvargonzález y Estelleros Armon S. A., n'España, y la collaboración d'otres instituciones como l'Armada española, el diariu El Comerciu, el consuláu de Portugal en Málaga, l'Autoridá Portuaria de Málaga, la Universidá de Málaga o'l patronatu de Turismu de Málaga.

 

La UIM realizó 21 cursos de mar y percorrió más de 17.000 milles náutiques dende 2006. Recibe, dende 2008, el distintivu Bandera Azul concedíu pola Asociación d'Educación Ambiental y del Consumidor (ADEAC), pola so actividá exemplar en formación rellacionada cola educación ambiental y marino, qu'anovó per décimu añu en 2017. Tamién foi galardonada en 2011 por Sail Training International Association col premiu Sail Trainer Organization of the Year, na so modalidá grandes veleros.