La Universidá d'Uviéu caltien abierta, hasta'l 15 d'ochobre, la convocatoria del III Premiu Internacional d'Investigación Lliteraria Ángel González, que'l so oxetivu ye incentivar la conocencia sobro la obra del poeta, la creación lliterario y artístico y los estudios humanísticos. Van Poder allegar al mesmu los trabayos de calter teóricu o críticu que traten sobro una tema tocante a la poesía hispánica de los sieglos XX y XXI. van tomase n'especial considerancia los que s'empobinen al estudiu de la obra d'Ángel González o de la so xeneración, la llamada xeneración del 50 o de mediu sieglu.

 

El premiu, promovido pola Cátedra que lleva'l nome del poeta uvieín, cola collaboración de la Fundación Banco Sabadell, ta dotáu con 6.000 euros y la publicación de la obra galardonada. Amás, el ganador va recibir 30 exemplares del llibru. Los trabayos presentaos tendrán de ser orixinales y rigorosamente inéditos, nun van poder ser publicaos total o parcialmente por cualesquier procedimientu impresu o electrónicu, nin ser premiaos n'otru certame. Escepcionalmente, van poder allegar aquellos estudios procedentes de tesis doctorales que, n'aplicación de la normativa universitaria, fueren depositaos nos repositorios dixitales de les correspondientes instituciones académiques.

 

En nengún casu tendrá de figurar nos orixinales el nome del autor nin indicación dalguna que lo identifique, sinón un lema acompañáu d'una plica. La estensión de los trabayos nun va ser inferior a 250 páxines a doble espaciu, con lletra Times New Roman de 12 puntos, nin superior a 400 páxines de les mesmes característiques. Nel so casu, les cites amplies esgazaes del cuerpu del escritu van poder dir a un espaciu, al igual que les notes a cuerpu de páxines, que'l so tamañu de lletra va poder ser de 10 puntos.

 

Na primer convocatoria, el galardonáu foi Vicente Luis Mora, col ensayu "El suxetu montiegu. Tipoloxíes suxetives de la poesía española contemporanea ente l'espeyu y la notredad (1978-2015)", ente que na segunda'l premiu foi p'Antonio Rivero Machina, pol trabayu "Posguerra y poesía. Construcciones crítiques y realidá histórica".