La Universidá d'Uviéu suscribió un nuevu conveniu de collaboración con Liberbank para desenvolver actuaciones conxuntes, que reafita l'espíritu de cooperación ente dambes entidaes y el so apueste pola meyora social y económicu de la rexón. Nel actu de la firma tuvieron presentes el rector de la Universidá, Santiago García Granda, y Ana Echenique, directora del Gabinete de Dirección y de Relaciones Institucionales de Liberbank.

 

La principal novedá d'esti conveniu ye la promoción d'un programa de formación financiera que va dar cabida a 120 estudiantes de la Universidá d'Uviéu y que va tar impartíu pola prestixosa Escuela de Finances d'Analistes Financieros Internacionales (AFI). El programa d'esta formación va tar venceyáu a la normativa MiFID II y al desenvolvimientu de práctiques na entidá financiera, dexando a los alumnos llograr la Certificación n'Información Financiera (CIF), imprescindible pa emprestar servicios d'información a veceros nuna entidá financiera a partir de xineru de 2018.

 

Amás d'esti programa específicu, la collaboración sigue en distintos ámbitos como los premios a los meyores espedientes académicos de la universidá (Grau d'Alministración y Dirección d'Empreses y Grau d'Economía), premio "Incubadora de Sondeos y Esperimentos", tanto a nivel rexonal como nacional, entamaos pol Departamentu d'Estadística de la Universidá; según los prestixosos premios d'investigación en medicina del deporte, colos que Liberbank lleva collaborando dende la so creación.

 

El conveniu entre Liberbank y l'Universidá d'Uviéu va tar vixente mientres dos años, que pueden ser prorrogables otros dos.

 

La representante de Liberbank, Ana Echenique, declaró que "ye un arguyu poder collaborar cola Universidá en reconocer l'esfuerzu de los alumnos y n'afitar la so formación, pos constitúi una pilastra perimportante pal futuru de la rexón y xuna de les inversiones más importantes no referente a la educación universitaria". Pela so parte, el rector, Santiago García Granda, estimó'l sofitu de la entidá bancaria, "fundamental por que la nuesa institución siga ufiertando a los asturianos y asturianes les oportunidaes que merecen", y destacó que, "siguiendo la tradición de convenios anteriores, esta collaboración ye xuna inversión bien importante en beques pa estudiantes de la Universidá, lo cual ye bien relevante pa la institución, una y bones el fin últimu ye la meyor formación del estudiantáu y la so preparación pa la vida llaboral. Amás, nesti casu, esa formación tien xuna acreditación oficial que da accesu al mercáu llaboral financieru, y supon un elementu bien positivu nesti oxetivu del insertamientu llaboral".