El Conseyu de Gobiernu de la Universidá d'Uviéu celebró esta mañana una xunta ordinaria, na Sala Clarín del Edificiu Históricu, na que dio lluz verde al Plan d'Organización Docente para'l cursu 2017-2018, que va incluyir un total de 4.449 asignatures (2.901 de grau y 1.360 de máster), correspondientes a 57 graos, otros tantos másteres y trés Programaciones Conxuntes d'Enseñances Oficiales (PCEOS) o graos dobles, según seis másteres Erasmus Mundus, dos de los cualos anovaron el so sellu.

 

L'órganu universitariu aprobó amás la convocatoria de 18 places de profesor acomuñáu de Ciencies de la Salú, diez d'elles nueves y ocho que fueron ocupaes mientres el cursu 2016-2017 por necesidaes docentes, y la convocatoria d'otres ocho places de profesor acomuñáu nos Departamentos de Ciruxía y Especialidaes Médicu-Quirúrxiques y Medicina, ocupaes tamién el pasáu cursu por necesidaes docentes. Coles mesmes, aprobóse la dotación de dos places de catedráticu d'universidá, na Área de Didáctica de les Ciencies Sociales, una de les cualos va convocase por vez de discapacidá.

 

Otramiente, el Conseyu dio la so aprobación a les comisiones de selección correspondientes a los siguientes cuerpos docentes universitarios: catedráticos d'universidá per promoción interna en 36 árees de conocencia; un catedráticu d'universidá pola vez de discapacidá; un catedráticu d'universidá per movilidá; profesores titulares d'universidá per vez llibre en 37 árees de conocencia; un profesor titular d'universidá pola vez de discapacidá; y cinco profesores contrataos doctores I3, del programa Ramón y Cajal.

 

Per otru llau, el Conseyu de Gobiernu dio la so conformidá, por asentimientu, al informe económicu-financieru del 2.º trimestre de 2017, según a los reglamentos de réxime internu del Institutu Universitariu d'Oncoloxía del Principáu d'Asturies (IUOPA) y de la Casa de les Llingües.

 

El Conseyu tamién dio'l vistu bonu a la ufierta d'empléu públicu de la PAS, que va consistir na reposición del 100% de les places de persones xubilaes nel añu 2016: 10 de personal funcionario y 14 de personal llaboral.

 

El rector, Santiago García Granda, informó de la puesta en marcha d'un procedimientu de consulta col fin de recoyer propuestes de la comunidá universitaria para decidir los proyectos a los que va dir destinada la cantidá reservada al presupuestu participativu de la Universidá d'Uviéu para l'exerciciu de 2018.

 

Profesores eméritos

 

Otru puntu del orde del día que foi aprobáu ye la propuesta de nomamientu como profesor eméritu de Vicente Gotor Santamaría, rector de la Universidá ente 2008 y 2016, pa los cursos 2017-2018 y 2018-2019. Amás, el Conseyu de Gobiernu foi informáu de cuatro pidimientos de nomamientu de profesores eméritos honoríficos, Xusto García Sánchez, del Departamentu de Ciencies Xurídiques Básiques, que foi decanu de la Facultá de Derechu; Alfonso Fernández Canteli, del Departamentu de Construcción ya Inxeniería de Fabricación; Carlos Suárez Nieto, de Medicina; y Fernando Bastida Ibáñez, de Xeoloxía.

 

Tamién s'informó de dolce pidimientos de profesores honorarios: de Química Orgánica ya Inorgánica, Ramón Liz Guiral; de Filoloxía Española, José Luis García Arias; de Bioloxía d'Organismos y Sistemes, Nuria Anadón Álvarez, Abelardo Casares Sánchez, Carlos Nores Quesada y Ana María Rodríguez Alonso; y, de Xeoloxía, María Luisa Martínez Chacón, Luis Carlos Sánchez de Posada, Elisa Villa Otero, Miguel Arbizu Senosiáin, Javier Alonso Rodríguez y Germán Flor Rodríguez.