Un equipu de 19 persones, lideráu por Margarita Fernández Mier, profesora titular d'Hestoria Medieval de la Universidá d'Uviéu, lleva a cabu una campaña arqueolóxica na necrópolis medieval de L.llinares (Castañera, Belmonte/Balmonte de Miranda) esti mes de xunetu, nel marcu de la investigación que dende l'añu 2009 vien desenvolviéndose na redolada de la parroquia de Vigaña –na llende con Castañera–, financiada por diversu proyectu del Ministeriu d'Economía y Competitividá.

 

Esta campaña trata d'averase a les comunidaes rurales altomedievales dende'l puntu de vista históricu y arqueolóxicu, dando protagonismu al campesinado, un grupu social malo d'estudiar mientres dichu períodu. La profesora Fernández Mier esplica que "los sieglos de la tardoantigüedad y l'Alta Edá Media, dende'l sieglu V al X, son claves para entender la hestoria de la Edá Media del norte peninsular. Les llínees de trabayu qu'historiaron el denomináu Reinu d'Asturies fueron munches, pero poques punxeron el focu n'analizar les comunidaes locales, el campesinado, dende'l so propiu campu d'actuación: el territoriu qu'aprovechen y que tresformen cola so actividá cotidiana".

 

A lo llargo d'estos años, l'equipu de la profesora Fernández Mier convirtió Villanueva  (Santuadrianu) y Vigaña (Balmonte de Miranda), aldegues de la área centro-occidental d'Asturies, en dos talos llaboratorios nos que decodificar la filiación histórica de los sos paisaxes y entender el so procesu de formación dende'l neolíticu hasta los nuesos díes. Les ocho campañes d'intervención arqueolóxiques sacaron a la lluz afayos d'importancia, pero sobremanera apurrieron un cúmulu d'información (dende los analises bioarqueológicos a los clásicos estudios arqueolóxicos o documentales) que dexa reconstruyir la vida y los procesos de territorialización del paisaxe de les comunidaes rurales. 

 

Les llendes de Vigaña nel sieglu XII aluden a Fontevigaña, na redoma de la capiya de L.llinares. Ellí sacóse a la lluz uno interesante necrópolis de la que yá s'alcontraron casi una trentena de tumbes del sieglu X. Tratar d'una necrópolis acomuñada a un despoblado medieval, tal que evidencia l'abondosa cerámica alcontrada na redoma, que se convierte en llugar de xunta tres l'abandonu de la zona d'hábitat y que se consolida como tal tres la construcción de la capiya dedicada a la nuesa señora de L.llinares nel sieglu XVII.

 

La información proporcionada hasta'l momentu por L.llinares complementa la llograda en Vigaña y dexa entender los procesos de reordenación territorial ente los sieglos X-XII nel valle del ríu Pigüeña, que suponen l'afitamientu d'unos llugares d'hábitat y de la rede parroquial (San Pedro de Vigaña y San Andrés de Augüera) y l'abandonu d'otres aldegues, casu del despoblado de L.llinares, que pasen a convertise n'elementos de fuerte calter identitario nel paisaxe.

 

Na presente campaña, l'equipu trata de delimitar la estensión de la necrópolis con métodos non invasivos, cola collaboración del grupu d'investigación Hydro-Geophysics and NDT Modelling Unit de la Universidá d'Uviéu, dirixíu pol profesor Paulino Fernández Álvarez, qu'al traviés de los estudios con geo-radar y magnetómetru traten d'apurrir información calidable que dexe entender la redolada de la zona arqueolóxica intervenida.

 

Los vienres 21 y 28 de xunetu realizarán visites empuestes al xacimientu, a les 12 del mediudía, a les que tán convidaos toos aquellos que quieran tener más información sobro'l xacimientu de L.llinares. Amás, ente los díes 27 y 29 de xunetu impartirán unos talleres arqueolóxicos colos que pretende sensibilizase a tola población sobro la importancia de los trabayos arqueolóxicos y hestóricos del territoriu. Tán principalmente empobinaos a los más pequenos, anque nellos puede participar tol mundu. Pa más información al respeutu y p'inscribise, los correos electrónicos de contactu son: adlbelmontedemiranda.com / infobelmontedemiranda.com

 

L'equipu de Margarita Fernández Mier lleva a cabu'l so trabayu nel marcu del Llaboratoriu d'Arqueoloxía Agraria, que trata d'afondar nel estudiu de los xacimientos arqueolóxicos dende perspectives multidisciplinares, cola puesta en valor del desenvolvimientu rural dende la perspectiva actual y recoyendo la tradición oral con especial interés na toponimia asturiana.