La Universidá d'Uviéu inauguró l'amuesa "Testamentum", dedicada al "Liber Testamentorum" o "Llibru de los Testamentos" de la Catedral d'Uviéu, unu de los más bellos exemplos de llibros miniados del sieglu XII, que va tar abierta al públicu hasta'l 5 d'agostu na Sala d'esposiciones del Edificiu Históricu. Tratar d'un proyectu d'un grupu d'estudiantes del Grau n'Hestoria del Arte de la Universidá, coordináu pola profesora Ana María Fernández.

 

El rector, Santiago García Granda, felicitó a los estudiantes y a la profesora pol trabayu realizáu, y afirmó que "la hestoria del arte déxanos conocer el pasáu al traviés d'un legáu material únicu ya irrepetible, testigu del tiempu y ceador coles mesmes de futuru". El Rector destacó amás el fechu de que "Testamentum" "ufierta una visión amplia y multidisciplinar, y que contribúi a la puesta en valor del nuesu patrimoniu cultural".

 

Ana María Fernández esplicó que "Testamentum" surdió nel marcu de l'asignatura Mercáu, Crítica d'Arte y Comisariado d'Esposiciones, na que se llevó a cabu un concursu d'idees ente l'estudiantáu y nel qu'un xuráu de profesores y profesionales del mundu del arte escoyó'l proyectu de los estudiantes Rubén Benavides, Isaac Pescuezu, Celia Argüelles, Deva Álvarez y Rubén Domínguez.

 

L'alumnu Rubén Domínguez, que tomó la palabra en representación de los sos compañeros, indicó qu'el so oxetivu "nun ye solo ufiertar un aproximamientu históricu artística al códice, sinón tamién proxectar el llibru escontra'l futuru, y por eso l'amuesa inclúi reinterpretaciones del códice realizaes por artistes contemporaneos". L'alumnáu estimó amás la collaboración de Sara Vázquez Canónicu.

 

Como complementu a la esposición entamóse un taller didácticu infantil el 12 de xunetu, y dos conferencies: la primera'l 13 de xunetu, impartida pola profesora de Ciencies y Técniques historiográfiques Josefa Sanz, sobro "El Liber Testamentorum, creación y función", y la segunda, el día 27, al cargu de la profesora d'Hestoria del Arte Raquel Alonso, que va tratar sobro "La construcción de la memoria asturiana na Edá Media: la obra de Pelayo d'Uviéu". Les conferencies van tener llugar a les 18:30 hores na Aula Rector Ales.