L'edificiu Industria 4.0, allugáu nel Parque Científicu Tecnolóxicu de Xixón, foi escenariu esta selmana del actu de defensa de les candidatures a la tercer edición de les Primes Proof of Concept, iniciativa basada nun modelu de financiamientu públicu-privada que fai posible que proyectos d'investigación nel ámbitu de la Estratexa Rexonal d'Especialización Intelixente, Asturies RIS3, realizaos pola Universidá d'Uviéu, aplicar na redolada industrial. Nesta ocasión, la empresa tractora que forma parte de la iniciativa ye ThyssenKrupp Elevator Innovation Center.

 

Les candidatures escoyíes ente los ocho proyectos qu'investigadores con llogros científicos en nanomateriales, grafeno, fabricación aditiva, analís de datos, sensores o biomedicina presentaron son les siguientes:

 

-   Control, diagnósticu y protección de máquines síncronas d'imanes permanentes por aciu sensores analóxicos d'efectu Hall, lideráu por David Díaz Reigosa, nel ámbitu de sensores.

 

-   Xestión integral d'enerxía eléctrica n'elevadores y pasareles, lideráu por Jorge García García, nos ámbitos de sensores y analítica de datos.

 

-   Desenvolvimientu de nuevos tresmisores pa les comunicaciones por lluz visible (CLVs) con lluminaries de diodos LED en redes de sensores Inalámbricos (RSIs), lideráu por Diego González Lamar, nel ámbitu de los sensores.

 

-   Aplicación de técniques de correlación dixital d'imaxes en redolaes industriales basada na so versatilidad y transferibilidad na caracterización de propiedaes mecániques y garantía d'integridá estructural, lideráu por Manuel López Aenlle, nel ámbitu de los sensores.

 

Cada unu d'estos proyectos va disponer d'una prima de 30.000 euros, cofinanciaos al 50% pol IDEPA y ThyssenKrupp Elevator Innovation Center. El investigadores van disponer d'un añu pa llevar a cabu la prueba de conceutu, polo que se preve que presenten les resultancies de los sos estudios a mediaos de 2018.

 

Los afayos van dexar a la industria ameyorar los procesos de fabricación, según la calidá de los sos productos, encarando nuevos retos y ganando competitividá. Nel actu tuvo presente la vicerrectora d'Acción Tresversal y Cooperación cola Empresa de la Universidá d'Uviéu, Eugenia Suárez Serrano.

 

El xuráu tuvo formáu pola directora xeneral del IDEPA, Eva Pando; el responsable de la Área de Competitividá ya Innovación del IDEPA, Jaime Fernández; el director d'Área de Cooperación cola Empresa y Empleabilidá de la Universidá, Enrique Covián; el director d'Área de Sofitu a la Investigación de la institución académica, Felipe Lombó; el director xeneral de Thyssenkrupp Elevator Innovation Center, Javier Sesma, y la directora de Proyectos de la empresa, Isabel González.

 

Les primes son la resultancia d'un conveniu robláu en 2015 ente la Universidá d'Uviéu y el IDEPA al que se xuntaron ArcelorMittal, na so primer edición, ya Industries Lácteas Asturianes, na segunda.

 

(Fonte: IDEPA / Universidá d'Uviéu).