El rector, Santiago García Granda, presidió esti mediudía, nel Paraninfu del Edificiu Históricu, l'actu d'entrega de diplomes a los 60 egresados de PUMUO, que completaron los cinco años d'esti Programa para Mayores. "Faéis ameyorar la Universidá coles vueses aportaciones, que lleváis a cabu dende la esperiencia. Esti actu y los años que cursastis PUMUO tienen de representar un momentu bien importante nes vueses vides", afirmó'l rector, quien destacó amás "les ganes de saber y de vivir" del alumnáu, y espresó-y el so felicitación "por completar estos cinco años".

 

Na ceremonia tamién tuvo presente'l vicerrector d'Estensión Universitaria y Proyección Internacional, Francisco José Borge, quien destacó "la dedicación, l'interés y l'agradecimientu" que demuestren les distintes promociones del programa, y recordó los sos dos años como profesor d'inglés del mesmu, ente 2001 y 2003, acabante llegar d'una estancia de dellos cursos académicos n'Estaos Xuníos.

 

Caxa Rural d'Asturies, patrocinadora de PUMUO xuntu al Conceyu de Xixón, tuvo representada nesta entrega de diplomes por Silvino Urizar, director de Riesgos, quien aseguró que "esti actu ye xuna cita obligada desque empecipiamos el nuesu patrociniu nel cursu 2001-2002, porque refuerza'l compromisu que Caxa Rural tien con Asturies. La nuesa Obra Social ye'l nuesu norte y guía pa siguir emprestando serviciu na rexón".

 

Senén Baxu, unu de los estudiantes que tomó la palabra, aseguró que "aprendimos munches llecciones, a tolerar les opiniones d'otres persones y a esperimentar el sentíu de les palabres convivencia y amistá". Pela so parte, David Silva, qu'intervieno en representación de la primer promoción de PUMUO de Xixón, fixo énfasis nel fechu de que'l profesoráu fixéra-yos sentir "como alumnos que podíen arriquecer les clases coles sos opiniones y esperiencies".

 

L'entusiasmu col que los egresados aplaudieron a los sos respectivos compañeros na recoyida de diplomes foi prueba de los venceyos d'amistá establecíos ente l'alumnáu, que, como Senén y David indicaron, mientres años compartieron, non solu pupitre, sinón tamién alderiques, escursiones culturales, comíes y sobremesas… Foi la directora d'Área de Formación Continua y PUMUO, María Ángeles Fernández, quien s'encargó de dir nomando a los distintos egresados por que recibieren la so certificación. La emotiva ceremonia, a la que nun faltaron familiares de los egresados, concluyó col "Gaudeamus igitur", interpretáu pol Coru de PUMUO.