La Universidá d'Uviéu celebró ayeri la segunda de les charres sobre casos d'entamadores que s'afitaron nel mundu empresarial, "Cites con ésitu", cola intervención de Fidel Delgado, director d'I+D+i y cofundador de Neoalgae, quien disertó sobre los sos entamos como entamador y sobre la so trayectoria. Nel actu tuvieron presentes la vicerrectora d'Acción Tresversal y Cooperación cola Empresa, Eugenia Suárez Serrano, Enrique Covián, director d'Área de Cooperación cola Empresa y Empleabilidá, y l'espertu en emprendimiento Kike Riesgu, que s'encargó de presentar al ponente.

 

Nel alcuentru, celebráu nuna conocida cervecería de Xixón (d'acordies coles mires de que los alcuentros sían cercanos y distendíos), Fidel Delgado tresmitió a los estudiantes que ser constantes resulta vital por que una idea de negociu llegue a bon términu, que ye necesariu esforciase enforma y que cuando llega la reconocencia suel haber detrás la superación de fracasos previos. Inclusive pa consiguir financiamientu, como nel so casu de la Comisión Europea, ríquese perseverar na presentación de proyectos y dir ameyorándolos, tal que esplicó.

 

Fidel Delgado, llicenciáu en Bioloxía, foi'l promotor d'una patente nacional "basada nes propiedaes activadores del sistema inmune de les microalgas, que suman el so efectu a les propiedaes beneficioses de bacteries lácticas". Ente les reconocencies qu'esti entamador recibió atópense'l Premiu FOLIE Junior de l'Asociación de mozos empresarios d'Asturies, el Premiu de FAPEA al meyor Productu ecolóxicu, el Premiu Bancaja al Meyor Proyectu Innovador y el Premiu al meyor proyectu empresarial Universitariu, concedíu pol CEEI y Universidá d'Uviéu.

 

El presentador del alcuentru, Kike Riesgu, recordó al alumnáu presente la oportunidá que tienen de participar nel Concursu Universitariu de Campeons del Talentu y el Emprendimiento, CHAMP-O, que se va desenvolver nel Campus de Mieres del 2 al 4 de xunu.