La Universidá d'Uviéu y l'Organización d'Estaos Iberoamericanos pa la Educación, la Ciencia y la Cultura (OEI) van siguir trabayando xuntes na formación de docentes, profesionales ya investigadores nel campu de la ciencia. Asina se recueye nel conveniu apocayá robláu por Santiago García Granda, rector de la Universidá d'Uviéu, y Paulo Speller, secretariu xeneral de la Organización d'Estaos Iberoamericanos (OEI), que foi presentáu esta mañana na Sala de prensa del Edificiu Históricu. 

 

Dende la firma en 2002 del primer conveniu ente dambes instituciones, l'usu de les tecnoloxíes d'enseñanza on-line dexó la formación d'unos 11.000 profesores de ciencies iberoamericanos en cursos pa docentes, lo mesmo que de unos d'unos 500 profesionales ya investigadores en toles modalidaes de posgráu (espertu, especialista, máster y doctoráu).

 

Esta collaboración conxunta dexó tamién avanzar nel afitamientu del campu de los estudios sociales de la ciencia y l'innovación como un espaciu académicu bien brengosu na rexón Iberoamericana per mediu d'asistencies técniques, alcuentros y congresos, munchos de los cualos tuvieron llugar n'Asturies. La última iniciativa nesta llínea foi la coordinación pola Universidá d'Uviéu, en collaboración col Institutu Universitariu de Lisboa, de la rede d'excelencia "Cátedra Ibérica de Ciencia, Tecnoloxía, Sociedá ya Innovación", qu'axunta a investigadores de 15 universidaes y organismos públicos d'investigación d'España y Portugal.

 

Nel marcu del nuevu conveniu qu'agora se presenta, la Universidá d'Uviéu y la OEI van siguir collaborando mientres los próximos cuatro años na organización de cursos, congresos, redes de docentes ya investigadores, publicaciones científiques y desenvolvimientu de materiales docentes, nel marcu del Campus d'Excelencia de la Universidá d'Uviéu y l'Área de Ciencies y el Centru d'Altos Estudios Universitarios de la OEI.