El rector de la Universidá d'Uviéu, Santiago García Granda, hai investido esta tarde doctor ‘honoris causa' al sicopedagogu, pensador y dibujante Francesco Tonucci, "Frato" (Fano, Italia, 1940), considerando los estraordinarios méritos qu'atropó a lo llargo de la so carrera nel campu de les Ciencies de la Educación, con especial relevancia y exemplaridá pal tresformamientu de los ecosistemes urbanos dende la defensa de los derechos de la infancia y la participación ciudadana de neñes y neños. El solemne actu celebróse nel Paraninfu del Edificiu Históricu.

 

Santiago García Granda resaltó que se trata del primer doctor ‘honoris causa' designáu pol actual equipu de gobiernu, y ye por tantu una cuestión simbólica ya intencional que sía esti ámbitu, l'educativu, el de la formación, el que güei reconozamos pos supon destacar la importancia de los referentes pedagóxicos, críticos y participativos pa la meyora de la práctica docente". Pela so parte, la profesora Carmen Fernández Rubio, directora del Departamentu de Ciencies de la Educación de la Universidá d'Uviéu, actuó como madrina de Frato y pronunció la so ‘laudatio'.  

 

Francesco Tonucci "Frato" espresó'l so "fondu agradecimientu" a la institución académica por esta distinción, y aprovechó la so intervención pa defender "la ciudá de les neñes y de los neños como una nueva filosofía de gobiernu" nel ámbitu local. Dende'l so puntu de vista, "l'alcalde qu'apriende a escuchar a los más pequenos conviértese realmente nel alcalde de toos". Coles mesmes, el pensador señaló que, ante los importantes retos que traviesa la sociedá a nivel internacional, "lo imprevisto, el fechu inesperáu, pue ser la fantasía y la creatividá de los neños". "Probablemente, cola so ayuda podamos salvar les nueses ciudaes y la nuesa política", señaló.  

 

(Imaxe del banner de portada: Universitat de Lleida).