La Universidá d'Uviéu, SacyrFluor S.A. y la Fundación Caxa Rural d'Asturies presentaron la convocatoria de la cuarta edición del Premiu Inxenieru del Añu n'Asturies, que tien como oxetivu reconocer a inxenieres ya inxenieros asturianos, o que la so actividá profesional tea venceyada al Principáu d'Asturies, en cualesquier de les cañes de la Inxeniería. El plazu de recepción de candidatures va tar abiertu del 1 d'abril al 31 de mayu.

 

L'actu tuvo llugar na Sala de prensa del Edificiu Históricu, coles intervenciones del rector, Santiago García Granda, el director n'Asturies de SacyrFluor S.A., Juan Vicente Piñera Faes, y el director de marketing de Caxa Rural d'Asturies, Alejandro Díaz González. Tamién tuvo presente'l director de la EPI Xixón, Juan Carlos Riolo.

 

El rector amosó "el prestu de la Universidá d'Uviéu porque siga la convocatoria d'esti premiu". "Yá se dixo qu'Asturies foi y ye trubiecu de pernomaos inxenieros ya inxenieres, formaos na so mayoría, y agora mesmu casi toos, na Universidá d'Uviéu. Debemos enforma al so pasáu, pero esiste un presente y un futuru brillosu. Los titulaos en graos el pasáu cursu pola Escuela Politécnica d'Inxeniería de Xixón fueron 265 titulaos y titulaes, 182 son homes y 83 muyeres, que tienen unes capacidaes que los faen competir tantu nos llaboratorios y centros d'I+D de grandes empreses d'Asturies como en tol mundu", afirmó Santiago García Granda.

 

El Premiu Inxenieru del Añu n'Asturies cunta con dos categoríes, "Gran trayectoria profesional" y "Proyección de futuru". El pasáu añu recayó nos inxenieros Sabín García Vallina (TSK) y Jorge Luis Rodríguez Rodríguez (Vectio). Tamién lo recibieron los inxenieros Vicente Luque Cabal ya Ignacio Secades Riestra (Robotics) y Enrique Macián Cardete (Dupont). El galardón consiste nuna escultura orixinal de l'artista María Jesús Rodríguez y un diploma acreditativu pa cada categoría.