L'Edificiu Históricu de la Universidá d'Uviéu acoyó esta mañana la presentación de la campaña titulada "Be part of Axalta, Be part of the Future", al traviés de la cual la multinacional Axalta Coating Systems  va ufiertar places a estudiantes y recién egresados para distintes árees nel so centru d'Asturies, amás d'un programa de beques. Na rueda de prensa de presentación intervinieron el rector, Santiago García Granda, el decanu de la Facultá d'Economía y Empresa, Julio Tascón, el director xeneral d'Innovación y Emprendimiento, Francisco Delgado, Juan Antonio Rodríguez (Human Resources Italy and Iberia, Axalta Coating Systems Europe, Middle East and Africa region) y Jorge Corrolades (European Telecommunications and Mobility leader en Axalta Coating Systems). 

 

El programa d'actos, que se va desenvolver na Facultá d'Economía y Empresa, va incluyir un alcuentru informativu, un foru pa entrega de currículums y pal desenvolvimientu d'entrevistes de trabayu, según una mesa redonda cola que se va cerrar la campaña. D'esta forma, el 22 de marzu celebrará un actu na Aula Magna de la Facultá d'Economía y Empresa nel que van intervenir como ponentes Juan Antonio Rodriguez (HR Lead Iberia, Italy & Lead Central Team EMEA), Carmen Gonzalez (Finance Center Lead), Alejandro Ramos (Procurement Center Lead), Jorge Corrolades (EMEA Communications and mobility Lead), Emma Charlotte Brett (EMEA Business Transformation Director).

 

Pela so parte, los díes 27 y 28 de marzu celebrará un foru d'empléu de Axalta Coating Systems na Facultá,  con cuenta del alumnáu y los egresados puedan ponese en contactu colos reclutadores y apurri-yos el so currículum vitae en mano. Nel marcu d'esti eventu van llevar a cabu tamién entevistes personales.

 

El final de la campaña va ser una mesa redonda, el 9 de mayu, que va xirar en redol a les entrugues "¿Asturies ye competitiva p'atraer y crear puestos de trabayu?" y "¿Qué papel desempeña la Universidá d'Uviéu nesta xera?". 

 

Wolfast Team Uniovi

Unu de los puntos más visuales de la campaña va ser el sofitu del equipu Wolfast Team, formáu por 22 estudiantes y dos profesores de la Universidá d'Uviéu, que participa na competición internacional MotoStudent. Axalta Coating Systems ye'l principal patrocinador d'esti equipu universitariu, y collabora, ente otres coses, coles pintures y recubrimientos que dexen unes condiciones de competición óptimas.

Axalta Coating Systems ye una compañía centrada puramente en pintures y recubrimientos qu'apurren a los veceres soluciones innovadores, coloridas y sostenibles.