IV Alcuentru Universitariu pola Igualdá nel Edificiu Históricu
El Rector destaca nel actu inaugural 'la valentía y la determinación de muyeres d'a pies que xugaron un papel clave na hestoria de los sos países y comunidaes'
La Universidá d'Uviéu inauguró nel Edificiu Históricu l'IV Alcuentru Universitariu pola Igualdá, entamáu con motivu del Día Internacional de la Muyer, celebración qu'en palabres del rector, Santiago García Granda, "ye un bon momentu pa cavilgar alrodiu de les meyores llograes, pidir más cambeos y celebrar la valentía y la determinación de muyeres d'a pies que xugaron un papel clave na hestoria de los sos países y comunidaes".
"Dende la Universidá d'Uviéu siguimos trabayando, como'l primer día, pa siguir fomentando y algamando mayores tases d'igualdá en distintos ámbitos, afirmó'l rector, quien fixo amás énfasis na tema escoyida pola ONU de 2017 pal Día Internacional de la Muyer: "Les muyeres nun mundu llaboral en tresformamientu: escontra un planeta 50-50 en 2030"
Nel actu inaugural, el rector tuvo acompañáu por Isabel Carrera, coordinadora del Programa de Doctoráu en Xéneru y Diversidá de la Universidá d'Uviéu; Mª Luisa Ponga Martos, concejala d'Atención a les Persones ya Igualdá del Conceyu d'Uviéu; y Almudena Cueto Sánchez, directora del Institutu Asturianu de la Muyer y Polítiques de Mocedá.
El programa del alcuentru empecipióse cola proyección de la película "Negocios ocultos", de Stephen Frears, sobre la que disertó y moderó un alderique-forum la investigadora Zuzel López, del Programa de Doctoráu en Xéneru y Diversidá de la Universidá d'Uviéu.
L'alcuentru inclúi'l martes una mesa redonda sobre "Práctiques y esperiencies d'igualdá en centros educativos", una conferencia "Ecofeminismo y curiaos nos espacios participativos", al cargu de Yayo Herrero, directora de FUHEM. Nel actu de clausura van intervenir Eugenia Suárez Serrano, vicerrectora d'Acción Tresversal y Cooperación cola Empresa, Cristina Valdés, directora xeneral d'Universidaes ya Investigación del Principáu, y Alejandro Rodríguez Martín, director de la Área de Responsabilidá Social, Sofitu a la Inclusión ya Igualdá.
Galería d'imaxes
