La Universidá d'Uviéu aprueba'l calendariu académicu pal cursu 2017-2018
El Conseyu de Gobiernu tamién ratificó los coeficientes de ponderación de les materies de la prueba d'evaluación de bachilleratu pal accesu a la universidá. La Orquesta y Coru de la institución yá cunta col so reglamentu
El Conseyu de Gobiernu de la Universidá d'Uviéu dio'l vistu bonu al calendariu académicu pal próximu cursu, 2017-2018, que'l so periodu lectivu va empecipiase'l miércoles 13 de setiembre, acutando'l llunes día 11 por que los centros puedan realizar xornaes d'acoyida y el día 12 pal solemne actu d'inauguración. El calendariu acuta amás una selmana previa a les vacaciones de Navidá pa realizar exames o evaluación continua, y en mayu, xusto al rematar les clases del segundu cuatrimestre, va haber una selmana llibre por que el alumnáu pueda preparar les pruebes, según una selmana ente los exames de cuatrimestre y los finales o estraordinarios, rematando'l 2 de xunetu.
Tamién s'estendió'l periodu de defensa de trabajo fin de grau hasta'l día 26 de xunetu "pa dar más facilidá a los centros", como indicó'l rector, Santiago García Granda, mientres la rueda de prensa celebrada tres el Conseyu. Coles mesmes, les instalaciones van permanecer abiertes mientres tol branu.
"Ye un calendariu que s'afai a les posibilidaes qu'ufierten los reglamentos, que s'aprobó por consensu y nel que se recueyen les aspiraciones de la comunidá universitaria", señaló'l rector, que tuvo acompañáu pola vicerrectora d'Estudiantes, Elisa Miguélez, y pol vicerrector d'Estensión Universitaria y Proyección Internacional, Francisco José Borge.
No que se refier los coeficientes de ponderación de les materies de la prueba d'evaluación de bachilleratu pal accesu a la universidá, a efectos d'almisión d'enseñances oficial de grau pa los cursos 2017/18 y 2018/19, fueron aprobaos ensin cambeos significativos salvu nel casu, lóxicamente, de les asignatures nueves, que, en palabres de Elisa Miguélez, "sopesáronse acordies con les decisiones de les xuntes de facultá de cada centru".
La institución académica aprobó coles mesmes el reglamentu de la orquesta de la Universidá d'Uviéu, que va tener un calter formativu y que nun 80% va tar integrada por persones de la comunidá universitaria, acutar el 20% restante a la sociedá polo xeneral. "L'oxetivu ye qu'Orquesta y Coru crezan xuntos", señaló Francisco José Borge.
Galería d'imaxes
