El ecoturismo rellacionáu cola observación de los osos puede tener consecuencies directes, tantu de calter positivu como negativu, sobre'l comportamientu de los plantígrados, la so fisioloxía y la so ecoloxía (el so impactu nel medioambiente), polo que cada situación y cada población d'osu pardu tienen de ser evaluaes antes d'establecer les normes que regulen dicha actividá. Esta ye la principal conclusión d'un estudiu publicáu na revista científica Biological Conservation, que realizó la Unidá Mista d'Investigación en Biodiversidá (UMIB) ¾integrada pol CSIC, la Universidá d'Uviéu y la Conseyería de Mediu Ambiente del Principáu d'Asturies¾, cola collaboración de centros d'investigación de Eslovenia, Finlandia y Noruega.

 

Ente les consecuencies positives, el investigadores espliquen cómo'l fechu de que les persones quieran conocer más de cerca esta especie puede redundar na meyora del so caltenimientu. Sicasí, ente les negatives atopen el riesgu de realizar los avistamientos n'árees d'alimentación o de celu, que, ante la presencia humana, l'osu podría dexar de frecuentar o frecuentar n'horarios bien concretos, provocándose asina una situación de estrés pal plantígradu.

 

L'osu pardu ye unu de los animales más demandaos del ecoturismo rellacionáu cola observación d'animales monteses n'Europa y Norte América. Al traviés de lliteratura científica publicada hasta la fecha, nesti estudiu se revisó y analizó el turismu oseru dende tres punto de vistes principales: les consecuencies directes sobre los osos, cómo'l turismu oseru puede afectar a les interacciones ente humanos y osos, y l'impactu social d'estes práctiques.

 

Nel Cordal Cantábricu, dada la recién espansión d'osos, amontóse la práctica del turismu oseru y, consecuentemente, va siendo d'estrema importancia la evaluación de los efectos de la observación de los osos sobre'l comportamientu y l'estáu fisiolóxicu de los individuos que s'atopen naquelles árees onde se tán realizando puntos d'observación d'osos.

 

Un primer pasu nesti sentíu foi realizáu apocayá pola Conseyería de Mediu Ambiente del Principáu d'Asturies, que ta financiando un trabayu del grupu d'investigación de la UMIB sobre'l desenvolvimientu de técniques non-invasivas pa detectar l'estáu de estrés de los osos sometíos a la observación directa per parte de los turistes. Un pasu más nesta dirección sería'l radiu-marcaje de los osos del Cordal pa evaluar directamente l'efectu del turismu oseru sobre'l comportamientu de los osossobremanera los sos usos del espaciu, movimientos y ritmos d'actividá.

 

Referencia

 

Vincenzo Penteriani, José Vicente López-Bao, Chiara Bettega, Fredrik Daleruma, María del Mar Delgado, Klemen Jerina, Ilpo Kojola, Miha Krofel, Andrés Ordiz. "Consequences of brown bear viewing tourism: A review". Biological Conservation 206 (2017) 169-180.