La Universidá y el Conceyu d'Uviéu van impulsar un programa pioneru pa tratar de frenar la migración de nuevos talentos. Uviéu sema talentu ta dotáu con un 1.160.000 euros y va tar vixente hasta'l 31 d'avientu de 2019. La iniciativa va dexar financiar ayudes pa cursar másteres universitarios y doctoraos industriales na Universidá d'Uviéu.

 

El rector de la Universidá d'Uviéu, Santiago García Granda, y l'alcalde, Wenceslao López, roblaron esta mañana'l conveniu de collaboración ente dambes instituciones pa poner en marcha'l programa Uviéu sema talentu acompañaos pola vicealcaldesa, Ana Taboada, y el vicerrector d'Investigación, José Ramón Obeso.

 

La Universidá d'Uviéu va ser la encargada de tramitar la convocatoria de les beques financiaes pol conceyu pa cursar un máster universitariu o un doctoráu industrial. El criteriu de concesión d'ayudes va ser l'espediente académicu y los aspirantes tendrán d'acreditar que taben empadronaos n'Uviéu a 1 d'ochobre de 2016 o bien que van cursar el máster o doctoráu industrial n'unu de los campus universitarios asitiaos nel conceyu. L'oxetivu ye que los alumnos con una trayectoria más brillosa completen la so formación n'Uviéu y nun migren a otres comunidaes o países.

 

La convocatoria correspondiente a 2016 va cuntar con 200.000 euros p'ayudes a cursar un máster universitariu. La cuantía de les beques va cubrir l'importe de la matrícula del máster. La convocatoria del próximu añu 2017 yá va incluyir los dos modalidaes d'ayudes (másteres universitarios y doctoraos industriales). Nel casu de los másteres van destinase 80.000 euros y pa les beques doctorales 120.000 euros.

 

Les beques pa realizar doctoraos industriales van tar dotaes con 20.000 euros añales y van ser anovables hasta final de conveniu. Los estudiantes de doctoráu que resulten becaos nel 2017, van ser por un máximu de tres ejercicio; los seis que resulten becaes en 2018 lo van ser por un máximu de dos exercicios, y los seis que s'incorporen en 2019, por un exerciciu, cuidao que el conveniu contempla la duración de cuatro año, y remata la so vixencia n'avientu de 2019. Esti sistema va dexar dar continuidá y estabilidá a los mozos estudiantes que van completar una estancia mínima del 50% del tiempu de realización na empresa acomuñada, o entidá, al proyectu de tesis doctoral.