Investigadores de la Universidá d'Uviéu trabayen nun proyectu qu'escuerre ameyorar la resistencia de los materiales gracies a la impresión en tres dimensiones. L'oxetivu del estudiu ye analizar qué influencia tienen los parámetros y variables d'impresión nel comportamientu de los productos fabricaos p'ameyorar dempués la configuración d'estos parámetros y maximizar coles mesmes la so resistencia mecánica.

 

El proyectu, que lleva por títulu Estudio y optimización de la influencia de los parámetros d'impresión nes propiedaes mecániques de materiales impresos con tecnoloxía FFF, ye frutu del trabayu del Grupu d'Investigación en materiales poliméricos pa la fabricación aditiva de la Escuela Politécnica d'Inxeniería de Xixón.

 

El profesor Jaime Viña Olay, director del Departamentu de Ciencia de los Materiales ya Inxeniería Metalúrxica, esplica que'l proyectu empezó a xestase en 2015 cuando nació la idea de producir pieces funcionales con máquines de fabricación aditiva FFF. Esta tecnoloxía (Fused Filament Fabrication) consiste na construcción de modelos en 3D por aciu la deposición de socesives capes de plásticu fundíu sobre una base nivelada y xeneralmente calefactada.

 

Jaime Viña Olay añede que na tecnoloxía FFF la estratexa que sigue la imprentadora vien dada por una configuración previa que realiza l'usuariu y que va ser determinante nel comportamientu mecánicu de la pieza impresa. Amás, pa llograr pieces funcionales ye necesariu utilizar un material base d'altes propiedaes. Trabayar, pa ello, con un filamentu de nylon reforzáu con fibra curtia de carbonu.

 

El procedimientu d'estudiu consiste na impresión de probetas con distintes configuraciones y el so posterior ensayu mecánicu. De les resultancies infierse cómo inflúi cada parámetru sobromanera y cuál ye la so configuración óptima.

 

El investigadores que participen nesti proyectu señalen que, por cuenta de la recién espansión de la tecnoloxía y al material tratáu, nun esisten normes o estándares pa la fabricación y ensayu de materiales impresos en 3D y, por tanto, ye clave desenvolver una metodoloxía d'estudiu.

 

Mientres el 2016, viénose trabayando en determinar unes condiciones estándar pal ensayu y la fabricación que dexen realizar les optimizaciones plantegaes. Anguaño llográronse les meyores necesaries nesta primer fase como pa empezar a optimizar en fondura los parámetros más importantes. A esti efectu llanzáronse dos Trabayos Fin de Grau pa 2017 que, amás, van ampliar la llínea d'investigación a nuevos materiales.

 

Hasta la fecha cuntóse col sofitu de MyMat Solutions, especialista en filamentos d'impresión d'altes prestaciones y spin-off del Centru d'Investigación en Polímeros LEARTIKER (Vizcaya) y col soporte del Institutu Tecnolóxicu d'Asturies (IUTA).

 

Referencia

 

Estudiu y optimización de la influencia de los parámetros d'impresión nes propiedaes mecániques de materiales impresos con tecnoloxía FFF. Noviembre 2016. Grupu d'investigación en materiales poliméricos pa fabricación aditiva.

 

Participantes: Miguel Alfonso Pablos, Jaime A. Viña Olay, Antonio Argüelles Amado, Inés Fernández Pariente, Mario Ramos García

 

Árees implicaes: Ciencia de los Materiales ya Inxeniería Metalúrxica y Mecánica de los Medios Continuos y Teoría d'Estructures. Escuela Politécnica d'Inxeniería de Xixón. Universidá d'Uviéu