Un equipu multidisciplinar de científicos, lideráu pola Universidá d'Uviéu, investigó los principales pescuezos de botella que torgaron tradicionalmente l'usu y l'ésitu de les técniques d'espresión xenética en medicina personalizada. Estos estudios fueron publicaos pola revistes Journal of Computational Biology y Journal of Biomedical Informatics. Les resultancies son frutu del trabayu conxuntu d'investigadores del grupu de Problemes Inversos del Departamentu de Matemátiques de la Universidá d'Uviéu y los equipos del doctor Steve Sonis, de la Universidá de Harvard y del Brigham and Women Hospital de Boston, y del doctor Leorey Saligan, del National Institute of Nursing Research (NIH) de Washington.

 

Juan Luis Fernández Martínez, profesor del grupu de Problemes Inversos de la institución académica asturiana esplica que los microarreglos, tamién conocíos como microarrays,  son chips d'ADN que s'utilicen pa midir la espresión de distintos xenes en célules sanes y célules que tán desenvolviendo ciertes patoloxíes. "L'interés d'estos chips ye l'analís de lo que se denomina'l transcriptoma, ye dicir de los xenes que pueden activase o reprimise en distintes condiciones, y traducise o non nes proteínes que codifican", comenta. Dichos xenes formen parte de lo que se conoz como pathways o víes xenétiques, que tienen una función biolóxica, que n'ocasiones se desconoz.

 

 "Lo que demostremos ye que les técniques de preprocesado utilizaes falsifican en parte les víes xenétiques implicaes nel desenvolvimientu de les enfermedaes, y que trabayando con datos brutos y los algoritmos fayadizos desenvueltos con esi envís, les resultancies ameyoren notablemente", añede esti profesor. Asina s'amosó n'enfermos de cáncer de próstata que desenvuelven síndrome de fatiga crónica al ser trataos con radioterapia. "Esti afayu tien grandes  implicaciones práctiques, cuidao que esplicaría en parte'l fracasu nel diseñu de munches melecines en fase clínica, al tener per oxetivu rutes xenétiques errónees", indica l'investigador de la Universidá d'Uviéu.

 

Selección de xenes

 

Este mesmu grupu d'investigación acaba d'analizar la robustez y fiabilidá de les distintes técniques de selección de los xenes implicaos na caracterización de fenotipos, amosando que la mayor fonte d'erru provien d'una mala catalogación de les amueses per parte de los espertos médicos. Nesti trabayu y n'otros que tán en cursu de publicación amuésase l'aplicación de diches metodoloxíes al estudiu d'enfermedaes rares, neurodegenerativas y distintos tipos de cáncer. "Anguaño tamos procesando les resultancies llograes nel casu del Alzheimer y les sos diferencies y semeyances col deterioru cognitivu leve, la enfermedá de Parkinson, ELA, la esclerosis múltiple y un ampliu grupu de distrofias musculares, analizando les víes xenétiques implicaes y la posible presencia de melecines güérfanes", comenta.

 

"Tamién vamos realizar l'estudiu de les principales enfermedaes neurodegenerativas del consorciu européu pal estudiu d'esti tipu de patoloxíes. Nel casu de les enfermedaes rares la principal torga ye l'ausencia de datos en munches d'elles, polo cual creemos qu'hai que empoderar a les asociaciones de pacientes. FINDACURE nel Reinu Uníu ye un claru exemplu", añede. Finalmente nel casu del cáncer el investigadores de la Universidá d'Uviéu tán estudiando los tumores que tienen un mayor impactu na población: pulmón, mama, próstata o colon, caracterizando los mecanismos qu'intervienen nos procesos de metástasis pal so diagnósticu precoz. "Toes estes bases de datos xenétiques son una gran mina de la cual puede llograse información pervalible pal ámbitu hospitalariu. Nun ye la medicina del futuru, ye'l presente, y dientro poco va ser el pasáu", conclúi Juan Luis Fernández Martínez.

 

Referencia: