El rector de la Universidá d'Uviéu, Santiago García Granda, y la presidenta d'Hunosa, María Teresa Mallada de Castro, roblaron esta mañana un conveniu pa la realización d'actividaes de promoción universitaria ya investigadora. L'alcuerdu anueva, amplía y regula el marcu de collaboración ente la institución docente asturiana y Hulleres del Norte pa la programación y evaluación de toles actividaes que se realicen de forma conxunta.

 

Ente les acciones más importantes que se van executar figuren la formación ya investigación sobre l'aprovechamientu comercial de la enerxía geotérmica y les múltiples aplicaciones na xeneración d'enerxía térmica y eléctrica de la riqueza forestal de la compañía, impulsando pa ello proyectos d'I+D+i  nesti campu,  cuantimás no qu'a sistemes d'esplotación refierse.

 

L'alcuerdu inclúi tamién potenciar la formación y promoción del usu de tecnoloxíes qu'ameyoren la eficiencia enerxética. Con esti propósitu, dambes instituciones van desenvolver  proyectos pa nuevos usos d'agua embalsada en mines zarraes a la esplotación de carbón, pa la so depuración y pa l'aplicación de tecnoloxíes de biogasificación n'agües residuales. Nel aspeutu docente, el conveniu preve promocionar  la formación académica por aciu la concesión de premios a los meyores espedientes o beques a tesis doctorales.

 

La Universidá d'Uviéu, pela so parte, va faer  especial fincapié en venceyar el conveniu marco al impulsu del Campus de Mieres. Tres la firma del conveniu, el rector de la institución académica asturiana, Santiago García Granda, amosóse satisfechu col alcuerdu alcanzáu y estimó a Hunosa la so disposición a collaborar siempres cola Universidá. Santiago García Granda señaló que l'alcuerdu va dexar siguir potenciando'l Campus de Mieres y destacó l'Aula de Geotermia como focu d'atracción d'estudiantes ya investigadores. El rector de la Universidá d'Uviéu añedió amás qu'esti nuevu marcu de collaboración va consiguir avanzar escontra la eficiencia enerxética de los edificios que componen el Campus de Mieres.

 

La presidenta d'Hunosa, que tamién estimó la disposición de la Universidá a collaborar cola hullera, destacó tolos aspeutos venceyaos al fomentu de la investigación ente dambes partes y mentó espresamente les nueves llínees de trabayu d'Hunosa en biomasa y biogás. María Teresa Mallada sorrayó la importancia de convertir la investigación en negociu y punxo como exemplos la xeneración de biogás a partir de les borrafes de granxes o de biomasa cola reforestación y aprovechamientu madereru d'antigües esplotaciones a cielu abiertu.