La Universidá d'Uviéu recibió güei el Premiu Nacional d'Edición Universitaria na categoría d'obra meyor editada en 2015 pol llibru Incunabula universitatis. Los Incunables de les Biblioteques Universitaries Españoles. La obra, coordinada por Ramón Rodríguez Álvarez, director de la Biblioteca Universitaria, y con diseñu del artista xixonés Manuel Fernández, recueye 981 incunables de 21 biblioteques universitaries españoles. La distinción, conocida'l pasáu mes de setiembre, foi recoyida güei pol vicerrector d'Investigación, José Ramón Obeso, y pola directora d'Área de Publicaciones de la Universidá d'Uviéu, Ana Isabel González. La Unión d'Editoriales Universitaries Españoles (XUNI) promueve estos galardones, nos que la institución académica asturiana yá foi estremada n'anteriores ocasiones, col fin d'averar la producción editorial universitaria a la sociedá.

 

El xuráu consideró que Incunabula universitatis "trai una xera d'escoyeta y síntesis del patrimoniu bibliográficu qu'hasta'l momentu nun se realizara". Enllibrada con gran luxu y con reproducciones d'imaxes fieles y de gran calidá, el xuráu destacó coles mesmes "la pervalible y cuidadosa selección de los incunables incluyíos nesti magníficu tomu".

 

La obra premiada, en palabres de Ramón Rodríguez, ye un estudiu de conxuntu de les colecciones d'incunables que curien veintiún biblioteques universitaries del nuesu país, ente elles la d'Uviéu, y de los repertorios bibliográficos que les recueyen. Amás, añede, "tratar col rigor que se merecen les ilustraciones qu'afaten a los incunables, les encuadernaciones que los protexen, los antiguos posesores de los mesmos antes de llegar a les biblioteques, que ye tantu como faer un percorríu pola biografía de los incunables, según una descripción de los exemplares únicos, raros y destacaos esistentes nes nueses biblioteques".

 

Nel llibru participen catorce autor de nueve universidad y ye frutu de la dedicación y l'esfuerzu del Grupu de Trabayu de Patrimoniu Bibliográficu de la Rede de Biblioteques Universitaries (REBIUN), coordináu por Ramón Rodríguez.

 

El tribunal encargáu de fallar los XIX Premios Nacionales d'Edición Universitaria, reconociendo les meyores obres publicaes poles universidaes y centros d'investigación españoles mientres 2015, tuvo integráu poles siguiente personalidaes: Víctor García de la Concha, director del Institutu Cervantes; Vicent Climent, rector de la Universitat Jaume I en representación de Crue Universidaes Españoles (miembru que s'ausentó naquelles candidatures nes qu'optaba la so Universidá); Manuel Rodríguez Rivero, críticu lliterariu; Manuel Toharia, divulgador científicu; Nuria Azancot, xefa de redacción d'El Cultural d'El Mundu; y Francisco Javier Rodríguez Marcos, responsable de Llibros de Babelia (El País).