El Present Day, un alcuentru de dalgunos de los galardonaos de los Premios Asicom-Universidá d'Uviéu colos meyores espedientes académicos de la Universidá, celebróse esta mañana na Aula Magna del Edificiu Históricu. La inauguración del actu tuvo a cargu del rector, Santiago García Granda, que destacó la importancia d'iniciatives como esta, empecipiada n'Estaos Xuníos, que dexa que los recién titulaos interactúen con invitaos d'especial relevancia, y amosó el so agradecimientu a Asicom por impulsar l'alcuentru. El rector tuvo acompañáu pol presidente de ASICOM, Carlos Fernández Collada, y el director de la Fundación Ealy Ortiz, Enrique Bustamante.

 

El programa d'esta actividá incluyó les intervenciones de Sergio Jellinek, asesor en Comunicación Estratéxica del Secretariu Xeneral de la OEA; Amador Menéndez Velázquez, científicu del ITMA Materials Technology d'Asturies; Gabriella Coleman investigadora de la Cátedra Wolfe, Universidá de McGill, Canadá; Francisco Guerrero, en representación de la OEA; y Cayetano Martínez de Irujo, en representación de la Casa d'Alba.

 

Amador Menéndez foi l'encargáu d'empecipiar l'alcuentru, con una charra titulada "Fronteres de la Ciencia y la Tecnoloxía", dedicada a l'aplicación de la nanotecnología nos ámbitos de l'agua, salú humana y enerxíes anovables. L'investigador encetó la importancia de purificar l'agua d'una manera barato y eficiente, cómo la nanotecnología apurre celdes y dispositivos de captura d'enerxía solar muncho más eficientes, o l'aplicación de la nanotecnología nel ámbitu de la salú humana, en concretu na rexeneración d'órganos. Coles mesmes, remató la so esposición con reflexones sobre la biónica o integración hombre-máquina. 

 

Unu de los egresados participantes, Pablo Villaboy, inxenieru técnicu n'Informática y máster n'Inxeniería Informática, allegó al alcuentru "pa conocer lo que se ta desenvolviendo nos llaboratorios, y per ónde va dir el futuru y ónde tán los campos más activos d'investigación". "Paezme perimportante la divulgación científica, y tamién conocer les vivencies d'estes personalidaes, non solo de les que tán más rellacionaes col mio ámbitu d'estudiu", afirmó.