La institución académica celebra'l vienres, 4 de noviembre, una xornada dedicada al autor del Quixote con una mesa redonda con espertos. El cocineru Nacho Manzano va ufiertar un Showcooking y degustación de la gastronomía cervantina nel sieglu XXI, y l'artista Juan Hernaz va impartir una Master Class sobre ilustración
La Universidá d'Uviéu entama'l próximu vienres, 4 de noviembre, una xornada dedicada a Cervantes, dientro de les actividaes del cuartu centenariu de la muerte del autor del Quixote. Sol títulu L'universu creativu de Cervantes, 400 años dempués, la institución académica celebra una mesa-coloquiu con espertos cervantinos, una Master Class sobre ilustración y un Showcooking y degustación gastronómica. Tolos actos van tener llugar nel Edificiu Históricu, mientres la mañana y la tarde, con accesu abiertu al públicu.
La primer cita de la xornada va ser a les 12:00 hores na Aula Magna de LAUDEO Centru Cultural (Edificiu Históricu), cola mesa redonda Universos creativos en redol a Cervantes, presentada por Francisco José Borge López (Vicerrector d'Estensión Universitaria y Proyección Internacional), Cristina Valdés (Directora Xeneral d'Universidaes) y Carlos Fernández Collada (Presidente de ASICOM). L'alcuentru col públicu va tar moderáu pol catedráticu de la Universidá d'Uviéu Emilio Martínez-Mata.
La mesa-coloquiu va cuntar coles intervenciones de los espertos Andrés Barradas Gurruchaga, que va falar sobre ¿El personaxe del Quixote del Llurdiu ye un arquetipu d'héroe o d'antihéroe?; Ana Vega-Toscano va ufiertar una esposición sobre Don Quixote al pianu; y Pedro Ignacio Ortega va centrar la so intervención nel universu lliterariu, cola ponencia Del testu narrativu al testu espectacular.
Mientres la tarde, el públicu que s'avere al Edificiu Históricu de la Universidá va poder participar nuna Master Class sobre Universos ilustraos. Del conceutu a la imaxe, a cargu del artista Juan Hernaz. La cita va ser a les 17:00 hores na Aula Severu Ochoa.
Un pocu más tarde, ente les 18:30 y les 20 hores, nel claustru baxu de LAUDEO, el cocineru asturianu Nacho Manzano va ufiertar un Showcooking y degustación sobre la Gastronomía cervantina nel sieglu XXI pa toos aquellos que deseyen averase al autor del Quixote dende otra perspectiva.
La xornada dedicada a Cervantes ta entamada en collaboración cola Conseyería d'Educación y Cultura, l'Asociación Iberoamericana de la Comunicación (ASICOM) y l'Escuela Cimera d'Arte Dramático d'Asturies (ESAD).
