Historiadora, feminista y divulgadora científica, Mary Beard, Premio Princesa d'Asturies de Ciencies Sociales, esibió güei na so visita a la Biblioteca d'Humanidaes, nel Campus del Milán, lo meyor de caúna de les sos facetes. La profesora británica destacó que, magar les meyores llograes poles muyeres nes últimes décades en favor de la igualdá, queda entá enforma camín por percorrer. "Nun ganemos la llucha y duldo enforma que viva pa velo", sorrayó. Mary Beard llamentó amás que la hestoria siga escribiéndose en masculín: "Dende Homero, la cultura occidental construyóse sobre la supresión de les muyeres".

 

La ganadora del Premio Princesa d'Asturies de Ciencies Sociales realizó estes declaraciones nun alcuentru con estudiantes y docentes nel Campus d'Humanidaes, onde tuvo ocasión amás d'almirar la placa realizada nel so honor pola Universidá d'Uviéu.  Mary Beard foi recibida pol vicerrector d'Estensión Universitaria y Proyección Internacional, Francisco Borge, y el decanu de la Facultá de Filosofía y Lletres, José Antonio Gómez, amás de poles profesores del grupu Deméter, que coordina Rosa Cid y que propunxeren la so candidatura pa los premios.

 

Yá mientres el coloquiu, la docente británica, profesora en Cambridge, empezó recordando la so temprana vocación pola hestoria antigua. Destacó qu'a la curtia edá de 5 años tuvo ocasión de visitar cola so madre del British Museum onde se prendió la llapada del so interés al contemplar los mármoles del Partenón y restos d'una tarta exipcia de fai más de 3.500 años. "Pudi ver qu'esistíen tartes fai 3.500 años, qu'había xente que les comía y que podía cuntase", indicó.

 

Mary Beard centró bona parte de la so intervención nel papel de la muyer na hestoria y na so llucha pola equiparación de derechos. Reconoció que, con una mirada optimista, lo llograo, siquier n'Europa Occidental, supunxo una verdadera revolución. Quexóse, sicasí, de que, aplicando un puntu de vista realista, queda inda enforma por faer. Llamentóse, por citar un exemplu, de la invisibilidá de la muyer na lliteratura antigua, qu'achacó precisamente a que yeren los homes quien escribíen la hestoria.

 

Premiar Princesa d'Asturies arrincó los aplausos del públicu na so reivindicación de les Humanidaes. Ante un auditoriu apurríu, manifestó que'l progresu científicu "tien de dir de la mano del pensamientu filosóficu y de la hestoria". Reconoció qu'en periodos d'escasez y de crisis económica'l so mensaxe nun resulta popular pero fixo fincapié na necesidá de faese oyer hasta ser escuchada.

 

Comentó una anécdota interesada que revela la importancia y utilidá de la hestoria antigua na actualidá. Mary Beard tuvo ocasión de participar nun reality pa mozos con fracasu escolar col conocíu chef británicu Jamie Oliver. L'agora Premio Princesa d'Asturies de Ciencies Sociales viose gratamente sosprendida pol interés d'estos adolescentes polos númberos romanos. Cuando-yos preguntar por qué, los participantes nel reality contestáron-y que solo asina s'enteraben de les feches de les películes y series britániques. Ye costume de la BBC utilizar la numerología romana.

 

Bien conocida precisamente pol so papel como divulgadora científica, gracies a los sos programes na BBC, destacó que, al so xuiciu, y magar que les redes sociales suponen n'ocasiones un altavoz de postures misóxines, son tamién una bona vía de comunicación. "Les sos ventayes superen los sos inconvenientes", declaró. Defendió la necesidá de sacar a la lluz la hestoria non yá de los ricos, de los pixos como dixo, sinón tamién de les clases populares, de la xente d'a pies. Mary Beard sorrayó que cada vez se dan más pasos pa visibilizar non solo'l papel de les muyeres sinón tamién el de les clases más desfavorecidas. "Güei sabemos gracies a estudios de restos orgánicos que los romanos comíen oricios", comentó como anécdota.

 

Preguntada polo que más-y sosprendió de Pompeya, echó mano de nuevu de la perspectiva de xéneru y contestó que'l chamizu. Magar la so importancia na ruta que los turistes faen pela ciudá, Mary Beard destacó que ye un edificiu murniu, con cames de roca y que, ensin dulda, foi bien distinta pa los homes y les muyeres.