La Cátedra Ángel González de la Universidá d'Uviéu empecipia un ciclu de documentales sobre biografíes lliteraries de dalgunos de los nomes más relevantes de la poesía hispánica contemporanea, que van dir siguíos d'un coloquiu abiertu con estudiosos y biógrafos de los protagonistes de les respectives sesiones. Col títulu Curtios acotaciones pa una biografía. Los poetes n'imaxes, el nuevu ciclu estrénase mañana col documental Ángel González, siguíu d'un coloquiu cola escritora Susana Rivera, vilba del poeta y académicu asturianu. La proyección va tener llugar a les 19:00 hores na Aula Severu Ochoa de LAUDEO Centru Cultural d'Estensión Universitaria, con accesu llibre hasta completar aforu.

 

El documental, realizáu pola Productora de Programes del Principáu d'Asturies, ufierta un percorríu pola vida y obra d'Ángel González, narráu en primer persona, y acompañáu de testimonios d'escritores y amigos como José Manuel Caballero Bonald, Emilio Alarcos, Jorge Semprún, Carlos Bousoño, José Agustín Goytisolo, Josefina Martínez, Juan Benito Argüelles o Ricardo Llabra, ente otros. Esti ciclu documental, al igual que'l restu d'actividaes de la Cátedra Ángel González, cuenta col sofitu de la Fundación Banco Sabadell y de la Conseyería d'Educación  y Cultura del Principáu d'Asturies.

 

El públicu va poder averase a la figura d'Ángel González y conocer un relatu biográficu al traviés de la so voz qu'arrinca cola alcordanza de la so madre, la so infancia, y la ventana dende la que, doliente de tuberculosis, siguía les estaciones del añu al traviés d'una zrezal. "Esa ventana yera para mi'l mundu", comenta'l poeta nel documental, onde recuerda tamién les sos primeres llectures de poesía tres l'esllumamientu" que lu produció Juan Ramón Jiménez, Gerardo Diego o García Lorca. El so pasu pola Universidá pa estudiar Derechu, la recepción del Premio Príncipe d'Asturies de les Lletres en 1985 o l'ingresu na Real Academia Española son dalgunos de los episodios que'l poeta repasa nesta producción audiovisual, qu'inclúi tamién poemes lleíos pol autor de Palabra sobre palabra

 

Susana Rivera, que va ser presentada pola directora de la Cátedra, Araceli Iravedra, va afondar na figura d'Ángel González y va abrir un coloquiu col públicu tres la proyección del documental. Rivera, doctora en Lliteratura Española y Francesa, y profesora Acomuñada nel Departamentu d'Español y Portugués de la Universidá de Nuevu México, centró'l so llabor docente ya investigadora na poesía y narrativa de los sieglos XIX y XX y ye una de les especialistes más destacaes na xeneración poética hispanomexicana.

 

El ciclu Curtios acotaciones pa una biografía. Los poetes n'imaxes va tener continuidá con otros representantes destacaos de la poesía hispánica contemporanea que se van dir programando'l próximu cursu.

 

La Cátedra Ángel González empezó la so actividá en febreru de 2013, y a lo llargo de pocu más de tres año celebró distintes conferencies y ciclos narrativos cola presencia d'autores nacionales ya internacionales, teatru, y produció un espectáculu cola musicalización de poemes del autor uvieín. La Cátedra presentó en 2015 Prosemas, la primer revista científica internacional sobre poesía española contemporanea, y el Premiu Internacional d'Investigación Lliteraria Ángel González.