La Universidá d'Uviéu acueye güei la XXIV Conferencia Nacional de Decanatos d'Artes y Humanidaes cola mirada puesta nel futuru d'estes titulaciones. L'actu inaugural, celebráu nel Salón d'Actos del Edificiu Alministrativu del Campus del Milán, cuntó cola presencia del rector, Santiago García Granda, la directora xeneral d'Universidaes del Principáu, Cristina Valdés; el conceyal de Cultura del Conceyu d'Uviéu, Roberto Sánchez Ramos, y el decanu de la Facultá de Filosofía y Lletres, José Antonio Gómez.

Foi precisamente'l decanu l'encargáu de presentar les temes que se van aldericar mientres tol día nel Campus del Milán al pie de los sos colegues de les universidaes españoles. José Antonio Gómez anunció que la conferencia va encetar cuatro cuestiones prioritaries pal futuru de les Humanidaes: el presente y futuru de los planes d'estudiu; ¿3 + 2 ó 4 + 1?; la meyora na divulgación d'esta área de la conocencia; l'empléu y l'empleabilidá de los egresados, y los graos en riesgu d'esclusión, col so diagnósticu y soluciones.

El decanu de la facultá nun despintó la difícil situación pola que traviesen les Humanidaes, sometíes –señaló—a unes polítiques "d'acoso y valtamientu pola opinión pública y parte de la publicada". José Antonio Gómez defendió tamién la necesidá d'esquizar el autoempleo o les spin off como vía de busca de trabayu de los egresados. "La enseñanza nun ye yá l'únicu futuru", destacó.

Palabres de rector

El rector, Santiago García Granda, que dio la bienvenida a los decanos, defendió la necesidá d'una universidá pública, moderna, atopadiza y hospitalaria". Abogó tamién pola transversalidad ente árees académiques y sorrayó nesti sentíu que les Humanidaes tienen de tar presentes en toles titulaciones.

La directora xeneral d'Universidaes, Cristina Valdés, exdecana de la Facultá de Filosofía y Lletres, sorrayó que, magar los problemes, hai que ser "optimistes" y fixo fincapié en que, en tiempos especialmente difíciles, "les Humanidaes tenemos enforma que dicir". Cristina Valdés llamó a tolos asistentes a la conferencia a "xenerar idees que se traduzan en propuestes de meyora". A lo último, el conceyal de la Área de Cultura del Conceyu d'Uviéu, Roberto Sánchez Ramos, defendió la vixencia de la Declaración del 14 de noviembre de 2007 y realizó un llamamientu por que les Humanidaes trespasen les barreres de les facultaes pa trescalar de conocencia a la sociedá civil.

La conferencia inaugural d'esti alcuentru de decanos corrió a cargu del expresidente del Principáu y senador per Asturies, Vicente Álvarez Areces, y trató sobre la Situación actual y perspectives de cabio nos estudios de grau.