El cambéu climáticu y la xubida de les temperatures modificaron tiempos y alteriáu el patrones clásicos nel desenvolvimientu de los cultivos agrícoles. La Universidá d'Uviéu participa nun proyectu d'investigación, financiáu pol Ministeriu d'Economía y Competitividá, pa determinar l'impactu que'l cambéu climáticu tien na producción de maíz, unu de los cultivos de branu más destacáu a nivel mundial. El profesor José Alberto Oliveira, investigador del Departamentu de Bioloxía d'Organismos y Sistemes, trabaya al pie de científicos d'otros centros españoles p'afaer los modelos de producción clásicos del maíz a la nueva realidá climática y tratar d'optimizar la productividá.

L'equipu d'espertos, lideráu dende la Universidá Politécnica de Madrid, desenvuelve distintos ensayos en parceles de cultivu asitiaes n'Asturies, Madrid y Córdoba nos que s'arrexunten parámetros como'l clima, les característiques del suelu, datos agronómicos o les feches de llantadera, floriamientu, etc. Tou esta información va dexar ellaborar modelos que definan qué variedaes son les más fayadices pa llantar en cada llugar, en qué feches y cuál ye'l manexu óptimo del cultivu.

L'estudiu, nel que toma parte la Universidá d'Uviéu, desenvuelve ensayos en parceles allugaes n'Asturies, Madrid y Córdoba pa recoyer información de campu ya invernaderu

Asturies ta considerada como un territoriu aparente pa collechar maíz. Les resultancies preliminares de los ensayos llevaos a cabu na parcela de cultivu allugada en Carreño demuestren, por casu, que les feches más tempranes de llantadera, en redol a mediaos de mayu, son más granibles porque les plantes florien nun momentu nel que nun-yos afecten tantu les foles de calor. "Comprobemos que si retrases la llantadera les altes temperatures de branu pueden coincidir col floriamientu (finales de julio-principio d'agostu) y eso repercute negativamente sobre'l rendimientu", esplica'l profesor Oliveira.

Los modelos de simulación de la crecedera del maíz utilizaos davezu nun tienen en cuenta los efectos de les altes temperatures na polinización. Colos datos agronómicos de campu ya invernaderu y los parámetros climáticos de los trés localidaes, el investigadores van desenvolver nuevos algoritmos de temperatura nos modelos de simulación de rendimientos de maíz, que van ameyorar les previsiones nes producciones d'esti cultivu n'España.