Con motivu del 250 aniversariu de la muerte de Benito Jerónimo Feijoo (1676-1764), l'Institutu Feijoo d'Estudios del Sieglu XVIII de la Universidá d'Uviéu entamó'l Congresu Internacional Cola razón y l'esperiencia: Feijoo 250 años después. A lo llargo de dos díes, xueves y vienres, más de cincuenta especialistes procedentes d'una trentena d'universidaes de siete países van analizar en ponencies y comunicaciones distintos aspeutos sobre la vida y obra del pensador.

El rector de la Universidá d'Uviéu, Vicente Gotor; la conseyera d'Educación, Cultura y Deporte, Ana González; la concejala d'Educación y Cultura d'Uviéu, Inmaculada González; el director del Institutu Feijoo d'Estudios del Sieglu XVIII, Álvaro Ruiz de la Peña Solar, y la directora del Congresu, Inmaculada Urzainqui, inauguraron el congresu nel Paraninfu y coincidieron na vixencia qu'entá tien Feijoo nos nuesos díes.  

Los cinco ponentes convidaos pola organización son Pedro Álvarez de Miranda (Real Academia Española), que va dictar la conferencia inaugural, Michel Dubuis (Universidá de Lyon), Joaquín Álvarez Barrientos (CSIC), actual presidente de la Sociedá Española d'Estudios del Sieglu XVIII, José Luis Gómez Urdáñez (Universidá de La Rioxa) y Francisco Sánchez-Blanco (Universidá de Bochum), responsable de la conferencia de clausura, que va tener llugar nel RIDEA.

El congresu, que foi posible gracies a la collaboración del Conceyu d'Uviéu, la Conseyería d'Educación y Cultura del Principáu d'Asturies, la FICYT y el RIDEA, propónse l'analís de los diversos aspeutos de la obra de Feijoo (lliterarios, científicos, filosóficos, etc.) estructurados en seis grandes bloques temáticos: contestu intelectual, aspeutos biográficos, pensamientu, dimensión espresiva, relaciones colos representantes del poder y recepción y representaciones de Feijoo. Col conxuntu de comunicaciones y ponencies ellaborará un llibru que se va publicar a lo llargo de 2015.

Ente les actividaes del congresu cuntará la presentación del tomu I de les Cartes erudites ya interesaes de Feijoo, qu'acaba de ser editáu por Inmaculada Urzainqui y Eduardo San José y foi publicáu pol Institutu Feijoo d'Estudios del Sieglu XVIII, el Conceyu d'Uviéu y KRK. L'actu va tener llugar el xueves a les 20.00 hores nel Muséu Arqueolóxicu d'Asturies.