La Universidá d'Uviéu presentó esta mañana la so ufierta  de cursos y actividaes deportives qu'a lo llargo d'esti cursu van desenvolver nos distintos campus de la institución académica asturiana. La Área de Deportes y Salú programó un total de 111 cursos de 24 disciplines deportives distintes. 

El Rector de la Universidá d'Uviéu, Vicente Gotor, el director xeneral de Deportes del Principáu, José Ramón Tuero, el conceyal de Deportes del Conceyu de Xixón, Pedro Barbillo, y el delegáu pa Deportes y Salú, Miguel del Valle, fueron los encargaos de presentar públicamente la ufierta deportiva de la Universidá, al pie de los representantes de les empreses ya instituciones que patrocinen dalguna de les actividaes.

Mientres la presentación del cursu deportivu l'atleta Roberto Marrón foi oxetu d'un senciellu homenaxe n'habiendo  llográu dos medalla de plata nel últimu Campeonatu d'Europa júnior en pista al campu pa sordos.

Alredor de 111.000 persones pasaron poles instalaciones deportives de la Universidá pa participar en dalguna de les actividaes programaes. Amás, la institución académica cuenta con deportistes federaos en 8 disciplines distintes y alredor de 2.000 estudiantes tomen parte en dalguna de les competiciones internes que s'apuesten ente combinaos de la mesma Universidá.

Tantu'l rector, Vicente Gotor, como Miguel del Valle estimaron el sofitu de les empreses ya instituciones al deporte universitario y destacaron la importancia de potenciar los valores del deporte dientro d'un estilu de vida saludable pa tolos universitarios.