La delegación de la Lliga de los Países Árabes qu'esta selmana realizó una visita institucional a Asturies interesóse pola ufierta docente y l'investigación que se realiza na Universidá d'Uviéu. Los vicerrectores de Internacionalización y Posgráu, Cuadonga Betegón; Profesoráu y Ordenación Académica, Julio Antonio González; y Estudiantes, Luis José Rodríguez, fueron los encargaos de celebrar una xunta de trabayu con embaxadores y encargaos d'asuntos culturales y de negocios de distintos estaos árabes, y cuntó tamién cola presencia de la conseyera d'Educación, Cultura y Deporte, Ana González. El rector, Vicente Gotor, nun pudo asistir al atopase en Madrid na inauguración del cursu universitariu presidida polos Reis d'España.

Los vicerrectores realizaron una presentación de la Universidá d'Uviéu y del Campus d'Excelencia Internacional, y contestaron a les numberoses entrugues de los miembros de la delegación, interesaos especialmente na ufierta de posgráu, les posibilidaes de movilidá pa los estudiantes, y la tresferencia de conocencia escontra'l sector empresarial.

L'embaxador d'Arxelia y decanu de la Lliga, Mohammed Haneche, actuó de vocera del restu de la delegación, integrada por  Musa Amer Odeh, embaxador del Estáu de Palestina; Aida Abdelmagied El Skeik, embaxadora de la República de Sudán; Mohamed Alfaqueeh Saleh, embaxador de Llibia; Charbel Aoun, embaxador del Llíbano; Abdulrazzak Al-Abdulghani, embaxador del Estáu de Qatar; Sulaiman Abdullah Al-Harbi, embaxador del Estáu de Kuwait; Mohamed Mezghani, embaxador de la República Tunecina; Kifaya Khamis Miyah Al-Raisi, embaxadora del Sultanatu de Omán; Ahmed Hamadi Bahah, primer conseyeru de la República Islámica de Mauritania; Abdulsalam Alawi Ahmed Al Awadhi, representante de la República del Yemen; Sultan Almezaini, primer secretariu y director xeneral del gabinete del embaxador del Reinu d'Arabia Saudina; Abdellah Dghoughi, encargáu de los asuntos culturales de la embaxada del Reinu de Marruecos, y Naima Bouchema, encargada de negocios de la Lliga de los Estaos Árabes. Al alcuentru tamién asistió'l director xeneral de Asturex, Alfonso del Ríu.

La Lliga d'Estaos Árabes, fundada en 1945, ta formada na actualidá por 22 países y representa un mercáu estratéxicu pa les empreses asturianes pola so cercanía, los llazos culturales y el desenvolvimientu económicu qu'esperimentaron les naciones que la integren mientres les últimes décades.