La CRUE destaca'l compromisu del presidente de Banco Santander cola universidá afiguráu n'iniciatives como Universia y los distintos programes de beques
La Conferencia de Rectores de les Universidaes Españoles (CRUE) fixo públicu un comunicáu pa espresar, en nome de toos el Rectores, el so enorme pesar pol fallecimientu del Presidente de Banco Santander, D. Emilio Botín. El rector de la Universidá d'Uviéu, Vicente Gotor, sumóse a les condolencias de la comunidá universitaria española y valoró especialmente'l mecenalgu promovido por Emilio Botín y el so sofitu al Campus d'Excelencia Internacional de la institución académica asturiana, ratificáu'l pasáu mes de xunu nun conveniu a que la so robla asistió'l Presidente de Banco Santander.
De siguío reproduzse'l comunicáu de la CRUE:
El Presidente Botín amosó siempres un fiel compromisu cola Universidá y cola CRUE, que se materializó al traviés d'innumberables xestos y acciones, ente les que destaca, la creación, nel añu 2000 de Universia, la Rede d'universidaes más importante d'Iberoamérica, centrada nos ámbitos de la educación y la conocencia, y qu'entamó distintos Alcuentros Internaciones de Rectores. El que se celebró'l pasáu mes de xunetu, en Rio de Janeiro, foi'l postreru gran eventu universitariu nel que participó D. Emilio Botín, que consiguió axuntar a 1103 rectores de 33 países, y que remató con un compromisu institucional de les universidaes presentes materializáu na Carta Universitaria Ríu 2014, sofitada por el mesmu Presidente de Banco Santander y pola Secretaría Xeneral Iberoamericana.
Coles mesmes, el Presidente fomentó la creación de los programes de beques, ente los que destaca'l de movilidá de Banco Santander, al traviés de la División Santander Universidaes, que sirvió pa establecer llazos de collaboración ente universidaes del espaciu iberoamericanu que, difícilmente, produciríase ensin la so collaboración. Numberoses universidaes indicáronnos que pa la mayoría de los estudiantes que llograron esta beca, la so estancia non yá foi bien satisfactoria, sinón que constituyó la esperiencia más importante de la so vida.
D. Emilio Botín tamién apostó pola creación del programa de Beques Santander-CRUE-CEPYME, que nació nel cursu 2008/2009 y qu'ufiertó a más de 12.500 estudiantes universitarios la posibilidá de realizar práctiques profesionales remuneradas en cualesquier de les PYME's participantes, y, por ello, facilitar el so insertamientu llaboral, que la so tasa d'ésitu superó'l 41 %. Tamos en presencia d'unu de los programes de beques universitaries pa práctiques más importante qu'esiste nel nuesu país.
Amás d'estes beques, el Presidente tamién creó'l programa Fórmula Santander, que xune la movilidá cola excelencia y el deporte. A estos programes hai que sumar les Beques Iberoamérica, pa Nuevos Profesores ya Investigadores que s'empecipió en 2011- 2012; y los programes qu'individualmente ta desenvolviendo cada universidá que cunta con un conveniu de collaboración con Santander Universidaes. Anguaño son bien pocos los estudiantes, profesores ya investigadores que desconocen o nun valoren positivamente l'esfuerzu de Banco Santander pola internacionalización de la Universidá, especialmente nel espaciu iberoamericanu.
Repitimos les nueses condolencias pola murnia noticia y aprofiamos la inestimable collaboración de D. Emilio Botín col Sistema Universitariu Español. Gracies a les sos acciones y al so apueste pola Universidá, "el Presidente", como siempres lu vamos recordar, tuvo, tuvo y va tener siempres, un enorme caláu na educación cimera del nuesu país.
