La Universidá d'Uviéu convoca l'I Certame Musical destináu a incentivar la creación y l'actividá cultural ente la comunidá universitaria. Los participantes tienen de plazu hasta'l 15 de xunetu pa formalizar la so inscripción y unviar un mínimu de dos y un máximu de cinco canciones orixinales (lletra y música) grabaes en soporte Mp3. La Universidá va entamar en septiembre un conciertu colos finalistes, y el ganador va competir nel Certame Musical Interuniversitario del Grupu 9 d'Universidaes.

El certame, que naz como complementu a les Aules de Música Pop Rock entamaes pol Vicerrectorado d'Estensión Universitaria y Comunicación, ta abiertu a tola comunidá universitaria. Pa participar ye imprescindible ser mayor d'edá y tar venceyáu a la Universidá d'Uviéu mientres el 2014 como estudiante d'enseñanza oficial, profesor ya investigador (PDI) o personal d'alministración y servicios (PAS). La modalidá ye única pero la participación puede ser como solista o como grupu, y nesi casu siquier unu de los integrantes tien de pertenecer a la institución académica.

El plazu d'inscripción remata'l 15 de xunetu y les bases pueden consultase na web de la Universidá d'Uviéu o nel siguiente enllaz http://goo.gl/49xT6N. El día 21 de xunetu comunicará'l nome de los escoyíos pa participar nel conciertu en directu que se va celebrar na primer selmana de setiembre.

El xuráu va valorar la instrumentación y calidá técnica del soníu y l'interpretación dientro de cada estilu musical, según la puesta n'escena y la creatividá artística. El ganador nesta fase va representar a la Universidá d'Uviéu nel III Certame Musical Interuniversitario del Grupu 9 d'Universidaes, que se va celebrar el vienres 26 de setiembre de 2014 nel marcu de les fiestes de San Fermín Txikito de Pamplona. El primera clasificáu nel certame nacional interuniversitario va recibir 2.500 euros, ente que'l solista o grupu que quede en segundu o tercer llugar va llograr 1.500 y 500 euros, respectivamente.