La esposiciónArena. Un paséu poles sableres d'Asturies empecipia en Lluanco una xira que la llevará a distintes localidaes asturianes. L'amuesa va viaxar por tol Principáu gracies a la collaboración ente la Universidá d'Uviéu y la Conseyería d'Educación, Cultura y Deporte. Los destinos de la esposición en próximos meses van ser Cangas, Avilés, A Caridá, Grau y Llanes.

Dende güei y hasta el próximu 6 de xunetu l'amuesa va poder visitase nel Muséu Marítimu d'Asturies en Gozón. La entrada va ser llibre pa tol públicu comenenciudu. Los fondos de la esposición pertenecen al Muséu de la Facultá de Xeoloxía de la Universidá d'Uviéu y representen una completa colección d'amueses catalogaes que dexen reparar la riqueza xeolóxica qu'atesora la mariña asturiana.

Arena. Un paséu poles sableres d'Asturies dexa al visitante efectuar un percorríu pola gran variedá de materiales que componen los arenales de 111 sableres asturianes, nun viaxe va d'Occidente a Oriente, siguiendo la trayectoria de les corrientes marines predominantes na mariña cantábrica. La esposición surdió de resultes de les investigaciones realizaes na Universidá d'Uviéu sobre la dinámica y xeomorfoloxía costera y fluvial de la nuesa mariña, según sobre les sos particulares característiques xeolóxiques.

L'amuesa de sable de cada sablera ta acompañada por una completa ficha qu'esplica al visitante tou la so caracterización amás de semeyes y mapes del arenal. Los testos qu'acompañen y espliquen los distintos elementos espositivos tán redactaos en castellán y n'asturianu, de cuenta que les singularidaes de los sables y de les nueses mariñes pueden apreciase amás dende la estraordinaria riqueza léxica de dambes llingües.