La Universidá d'Uviéu, al traviés del Campus d'Excelencia Internacional, pon en marcha un Llaboratoriu d'Analís Clínicu del Movimientu que va abrir nueves llínees d'investigación rellacionaes cola psicomotricidad de pacientes con distintes patoloxíes. La iniciativa, en collaboración col Hospital Universitariu Central d'Asturies (HUCA), va aplicar les nueves tecnoloxíes de captura del movimientu al siguimientu de la evolución d'enfermedaes onde tea implicada la movilidá y tratamientos de rehabilitación.

El rector, Vicente Gotor, presentó esta mañana'l Llaboratoriu d'Analís Clínicu del Movimientu acompañáu pol xerente de la Área Sanitaria IV, Jaime Rabanal; el catedráticu de Pediatría de la Universidá d'Uviéu y director de la área de Xestión y Clínica de Pediatría del HUCA, Fernando Santos; l'especialista en Medicina Física y Rehabilitación del Hospital Valle del Nalón, Ricardo Llavona Fernández; y la vicerrectora d'Investigación y Campus d'Excelencia Internacional, Paz Suárez Rendueles.

El llaboratoriu va tar allugáu nel Edificiu d'Investigación del Campus de Mieres, que cunta con un avanzáu equipamientu de toma d'imaxes y software específicu pa la captura del movimientu. Esta tecnoloxía va dexar evaluar les esviaciones del movimientu en diverses patoloxíes y l'evolución de la enfermedá y de les intervenciones terapéutiques aplicaes.

El sistema que se va utilizar ta constituyíu por un conxuntu de sensores de movimientu que s'afiten en ciertos puntos anatómicos y un software pa captura y analís de movimientu. La información proporcionada polos sensores mientres la captura, en combinación con un software d'animación 3D, dexen reproducir el movimientu treslladáu a un modelu biomecánicu, que fai posible darréu un analís precisu de los movimientos prindaos.

El serviciu, allugáu nel Edificiu d'Investigación del Campus de Mieres, cuenta con una tecnoloxía piquera en tomar d'imaxes pa llograr patrones de referencia

El catedráticu de Pediatría de la Universidá d'Uviéu y director de la área de Xestión y Clínica de Pediatría del HUCA, Fernando Santos, va ser el coordinador científicu del llaboratoriu, nel que va figurar como asesor científicu l'especialista en Medicina Física y Rehabilitación del Hospital Valle del Nalón, Ricardo Llavona Fernández; ente que'l Centru d'Innovación de Mieres va encargarse de desenvolver el software específicu pa esti tipu d'investigaciones.

Ente los oxetivos del llaboratoriu cabe destacar:

• Llograr patrones de referencia en población sana.
• Caracterizar en diverses patoloxíes les esviaciones del movimientu analizáu en relación col estándar de referencia establecíu.
• Objetivar cuantitativamente los efectos sobre'l tipu de movimientu analizáu de la evolución de la enfermedá y de les intervenciones terapéutiques aplicaes.
• Promover la collaboración con centros especialistes rexonales, nacionales ya internacionales.
• Desenvolver el software específicu afechu a les alteraciones del movimientu oxeto d'investigación.

La Universidá d'Uviéu va roblar un conveniu de collaboración col HUCA pal desenvolvimientu de les investigaciones, magar el llaboratoriu naz con vocación d'emprestar serviciu a tola rede sanitaria asturiana.

Esti proyectu ye una iniciativa del Campus d'Excelencia Internacional de la Universidá d'Uviéu, enmarcada nel Cluster de Biomedicina y Salú, en que la so agregamientu estratéxicu ta integráu'l HUCA. L'equipamientu tecnolóxicu del Llaboratoriu d'Analís Clínicu del Movimientu forma parte del programa Profesionales Dixitales impulsáu pol proyectu Rede.es del Ministeriu d'Economía y Competitividá.

Imaxe banner de portada

Una de les cámares de captura de movimientu del nuevu Llaboratoriu d'Analís Clínicu del Movimientu.