Centenares d'alumnos de la Facultá de Ciencies tuvieron ocasión de compartir una mañana colos sos ídolos Peter Higgs, François Englert y el director xeneral del CERN, Sergio Bertolucci el pasáu ochobre cuando recoyeron n'Uviéu'l Premiu Príncipe d'Asturies d'Investigación Científica y Técnica. Como alcordanza d'esa fecha señalada la Fundación Príncipe d'Asturies fixo apurre ayeri a la Universidá d'Uviéu del enceráu nel que los trés galardonaos estamparon la so firma al pie de les fórmules que conducieron al descubrimientu del bosón de Higgs, la llamada partícula de Dios.

La cayuela va asitiar na mesma aula de la Facultá de Ciencies na que Higgs y Englert ufiertaron una conferencia y animaron a los estudiantes pa siguir el so llabor investigador "porque hai munches coses por afayar." Antes de ser treslladada a la Facultá de Ciencies los miembros del xuráu del Premio Príncipe d'Asturies d'Investigación Científica y Técnica posaron xuntu al enceráu autografiado polos ganadores de la pasada edición. 

Mientres la so visita a la Universidá d'Uviéu, los científicos, que darréu tamién fueron galardonaos col Premiu Nobel de Física, recordaron les dificultaes y crítiques que collecharon hasta que llograron formular la so teoría y estimaron al CERN los esfuerzos pa probar la so validez cuatro décades más tarde.