La Universidá d'Uviéu lidera un proyectu européu p'ameyorar l'estáu de caltenimientu de los ecosistemes dunares de la mariña cantábrica por aciu la restauración de 10 espacios de protección especial allugaos n'Asturies, Cantabria y País Vascu. Esta iniciativa cunta con plazu d'execución de cinco años y un presupuestu de 1,4 millones d'euros con cofinanciación del programa LIFE+ de la Unión Europea, especializáu en temátiques mediu ambientales.

La xestión y coordinación de la preparación de la solicitú del proxecto "Caltenimientu de la biodiversidá vexetal nos arenales costeros cantábricos" foi realizada pol Cluster d'Enerxía, Medioambiente y Cambéu Climáticu del Campus d'Excelencia Internacional teniendo en cuenta'l modelu de la cuádruple hélice, yá que collaboren empreses, alministraciones públiques, centros d'investigación y asociaciones. Nel proyectu tomen parte seis socios de los trés comunidaes autónomes, y cuenta col sofitu d'once administraciones locales, trés autonómiques y del Gobiernu d'España xuntu con ONGs, sociedaes científiques y colectivos venceyaos a la protección del mediu ambiente.

Les acciones inclúin eliminación de pinos y especies exótiques invasores, repoblación de plantes estructurales y reintroducción d'exemplares de hábitats dunares consideraos raros, amenaciaos o protexíos

Ente otres acciones, van poner en marcha planes de caltenimientu pa reforzar la población de plantes estructurales y reintroducir especies de hábitats dunares consideraes como rares, amenaciaes o protexíes, restaurar la dinámica dunar por aciu la instalación de captadores de sable, amenorgar la presencia de pinos y menguar l'efectu negativu d'estos plantíos según esaniciar especies exótiques invasores.

Llugares d'actuación

Les acciones van desenvolverse en 10 Llugares d'Importancia Comuñal (LICs) a lo llargo de la mariña cantábrica incluyíos na Rede Natura 2000:

• Asturies: van centrarse nel sistema dunar de Barayo ente los conceyos de Navia y Valdés, na sablera de Berdiciu(Gozón) y nel sistema dunar de Vega (Ribesella).
• Cantabria: sistema dunar de Liencres (Piélagos), sistema dunar de Somo, (Ribamontán al Mar) y la sablera de Berria-Figares (Santoña).
• País Vascu: les actuaciones van centrarse na sablera de la Arena (nos conceyos de Muskiz y Ziérbana - Vizcaya), la sablera de Laida (conceyu de Ibarranguelu - Vizcaya), el sistema dunar de Santiago (conceyu de Zumaya - Gipuzkoa) y el sistema dunar de Zarauz (Zarauz - Gipuzkoa).

L'ecosistema dunar viose especialmente alteriáu pola actividá humana y pola esistencia de fenómenos destructivos como nubes y riaes, que menguaron o alteriaron sensiblemente la biodiversidá propia d'estos medios y les sos poblaciones naturales d'especies monteses. Bona parte de les especies esclusives d'estos ambientes apaecen anguaño en llistes coloraes de flora amenaciada y catálogos de protección de flora y fauna.

Ente otres midíes concretes, esti proyectu plantega, por casu, la eliminación d'unos 250 pinos del sistema dunar de Barayo, el caltenimientu de 28 especies presentes nos hábitats dunares, l'allugamientu de 50.000 plantes estructurales pa favorecer la dinámica natural de les dunes o la eliminación de flora exótica invasora. Tamién se va actuar na restauración del hábitat de les dunes costeres fixes y dunes móviles de mariña, y va dar en la protección de sistemes dunares con valláu de cuerdes y postes de madera.

Socios participantes

• Sociu Coordinador
  • Universidá d'Uviéu, al traviés del Equipu Científicu del Xardín Botánicu Atlánticu de Xixón, el personal del Institutu de Recursos Naturales y Ordenación del Territoriu (INDUROT) y el Departamentu de Bioloxía d'Organismos y Sistemes (BOS).
• Socios Beneficiarios
  • Dirección Xeneral de Sostenibilidá de la Mariña y del Mar. Ministeriu d'Agricultura, Alimentación y Mediu Ambiente (MAGRAMA)
  • Dirección Xeneral de Montes y Mediu Natural del Departamentu d'Innovación, Desenvolvimientu Rural y Turismu de la Diputación Foral de Gipuzkoa
  • Dirección Xeneral de Montes y Caltenimientu de la Naturaleza del Gobiernu de Cantabria. Conseyería de Ganadería, Pesca y Desenvolvimientu Rural.
  • Ecología Litoral, S.L.
  • Sociedá de Ciencies Aranzadi

El proyectu cunta, amás, col respaldu de distintes alministraciones locales (conceyos de Navia, Valdés, Gozón y Ribesella, n'Asturies; Piélagos, Ribamontán al Mar y Santoña, en Cantabria; y Muskiz, Ziérbana, Ibarranguelu, Zumaya y Zarauz, nel País Vascu), comunidaes autónomes, ONG y entidaes venceyaes al caltenimientu del mediu ambiente.