La Universidá d'Uviéu, en collaboración col Conceyu d'Uviéu, entama la I Amuesa de Teatru Universitariu que va poder trate nel Teatru Filarmónica dende'l próximu llunes, 28 d'abril, hasta'l miércoles día 30. El programa propón un percorríu variáu que va dende'l teatru absurdu de Ionesco hasta la poesía d'Ángel González, pasando por un teatru social y comprometíu. Toles representaciones van empezar a les 20:00 hores y l'entrada va ser llibre hasta completar aforu.

El grupu de teatru de la Universidá de Cantabria va ser l'encargáu d'abril el ciclu poniendo sobre les tables La cantante calva, de Eugéne Ionesco. El montaxe empobináu por Rita Cofiñu plantega una crítica a la pequena burguesía universal, a la so alienación y perda d'identidá, a la incomunicación, amuésanos la vida cotidiana ensin conteníu, les falses apariencies, la sensación d'inmovilidá nel tiempu que nos congoxa, la falta de relación ente los seres humanos. Una pieza qu'axunta toles claves del llamáu teatru del absurdu.

Fantasía de los contrastes, d'Antonio Martínez Ballesteros, va llegar a les tables de la Filarmónica'l martes día 29 de la mano del grupu de Teatru de la Universidá de Navarra. El testu ye una selección d'escenes de Fantasía con retayos, La comedia de los contrastes y Desahuciu, col agregu d'otra pieza escrita por el mesmu grupu, qu'afonden nes grandes diferencies sociales que traxeron la crisis, los retayos, la corrupción, la política, o lo que sía, que consiguieron quebrar la sociedá. La dirección de la pieza va correr al cargu d'Óscar Arzaiz.

El grupu de teatru de la Universidá d'Uviéu va ser l'encargáu de cerrar ESTA primer edición de l'amuesa con Añorar el futuru que nun esiste, un aproximamientu a la obra d'Ángel González con dramaturxa de Etelvino Vázquez pa convertir en cuerpu, voz y emoción dalgunos de los testos del autor, faciendo d'ellos pequenos monólogos dramáticos.