El proyectu, que foi premiáu con 3.000 euros en metálicu, contempla que la estructura necesaria p'allugar la empresa construyir nun marcu ecolóxicu de sostenibilidá y respetu al mediu ambiente
Pablo Ruiz, alumnu del Grau n'Inxeniería Forestal y del Mediu Natural, alzóse col primer premiu nel VI Concursu d'Idees Empresariales de la Universidá d'Uviéu, con CockFarm180, el proyectu d'una granxa d'animales dedicada a la cría y vienta de cucaraches, tantu como alimentu en vivu p'animales de zoolóxicos y particulares, como de manera esmagayada pa empreses dedicaes a la producción de piensu. El galardón consiste en 3.000 euros en metálicu y asesoramientu pa poner en marcha esta idea empresarial.
Ente los motivos de la elección de les cucaraches atópense que se multipliquen a gran velocidá y nun precisen caltenimientu nin condiciones específiques. Amás, nun-yos afecten les enfermedaes nin plagues y viven bien en condiciones de hacinamiento. "Con elles podríense ellaborar y procesar farines riques en grases saludables, calciu, fierro y cinc", indica l'estudiante galardonáu.
Pablo Ruiz tien 25 años, ye natural de Santander y estudia na Escuela Politécnica de Mieres. Tal que esplica, "va tiempu paecía una llocura una granxa de cascoxos y depués fueron un ésitu, solo hai que salvar una gran barrera, la social, especialmente a escala Europa yá que si vamos a Asia vemos que les cucaraches son parte de la dieta de millones de persones, y vese con normalidá".
El proyectu contempla que la estructura necesaria p'allugar la empresa construyir nun marcu ecolóxicu de sostenibilidá y respetu al mediu ambiente, con materiales naturales, dotando a la empresa d'un calter naturalista (ECO-GRANJA) y visualmente curiosa pal veceru.
El segundu premiu, dotáu con 2.000 euros, foi para Ainhoa Cid y Natalia Ferreira, alumnes del Master en Teledetección y Sistemes d'Información Xeográfica, que la so propuesta, "Karten", naz cola misión d'estrumir al máximu'l potencial de la Teledetección y los Sistemes d'Información Xeográfica (SIG). Pela so parte, el tercer premiu, de 1.000 euros, recayó en Catuxa Irene Fernández, estudiante d'Inxeniería Informática, y el so proyectu "Sportsintlligence": un software específicu pal analís de gran cantidá de datos por aciu intelixencia artificial y minería de datos pa facilitar y sofitar tomar de decisiones técniques nel deporte.
