La Universidá d'Uviéu pon en marcha la Cátedra Leonard Cohen, Premio Príncipe d'Asturies de les Lletres 2011, que tien como oxetivu contribuyir a la conocencia y espardimientu de la obra del artista canadiense y fomentar la creatividá poética y musical na nuesa sociedá, tantu dende'l puntu de vista divulgativu como dende'l formativu. El rector de la institución académica asturiana, Vicente Gotor, y la directora de la Fundación Príncipe d'Asturies, Teresa Sanjurjo, presentaron esta cátedra como una amuesa de la vinculación de los premiaos con Asturies y de la estrecha collaboración institucional.

La institución académica firma un conveniu col artista nel que se compromete a espublizar la so obra y fomentar acciones culturales que reviertan na sociedá

Esta cátedra foi posible gracies al deséu de Leonard Cohen de donar la dotación económica del Premio Príncipe d'Asturies (50.000 euros) a una iniciativa cultural y al sofitu de la Fundación Príncipe d'Asturies por que'l destín del dineru del galardón sía esta propuesta. El proyectu, singular y únicu n'España, pretendi ser "un llugar d'alcuentru ente la poesía y la música, ente los ceadores y el so públicu, ente l'arte y la sociedá", tal como se recueye nel conveniu robláu pol rector de la Universidá d'Uviéu, Vicente Gotor, y pol artista Leonard Cohen.

Ente les llínees prioritaries que va encetar la Cátedra Leonard Cohen y que se recueyen nel mentáu conveniu destaquen:

• Incentivar la conocencia, espardimientu, formación ya investigación sobre aspeutos rellacionaos cola obra de Leonard Cohen y la creación poético y musical.
• Programar actividaes culturales en redol a Leonard Cohen y la creación poético y musical (conferencies, meses redondes, esposiciones, conciertos, congresos, seminarios, talleres, premios lliterarios, etc.).
• Favorecer y patrocinar equipos y trabayos d'investigación nes árees y materies propies del so oxetu, per mediu de beques o cualesquier otru tipu d'acción.
• Espublizar les resultancies de los sos proyectos ya iniciatives.

L'artista treslladó'l so prestu pola puesta en marcha d'esta iniciativa cultural venceyada a Asturies. La cátedra cumple, amás, unu de los oxetivos de la Fundación Príncipe d'Asturies: el de xenerar oportunidaes d'altu valor cultural qu'ayuden a estrechar los llazos de los sos galardonaos con Asturies y redunden en beneficiu de la so sociedá civil.

La cátedra va ser xestionada pola Universidá d'Uviéu, al traviés del vicerrectorado d'Estensión Universitaria y Comunicación. Como'l restu de cátedres culturales va cuntar con una dirección, que va ser ocupada por un miembru del personal docente de la institución académica nomáu pol rector. Amás, va tener un Conseyu de Dirección que va aprobar la programación añal.

Semeya de portada:

Leonard Cohen mientres l'homenaxe recibíu nel Teatru Xovellanos de Xixón. Iván Martínez / FPA.