La Cátedra Telefónica de la Universidá d'Uviéu va axuntar en Xixón a mediu centenar de hackers sociales na segunda edición del HackForGood, una iniciativa que reconoz el trabayu de los desarrolladores pa construyir aplicaciones tecnolóxiques que resuelvan retos sociales rellacionaos cola innovación social, la educación y l'empléu. Xixón, Madrid, Barcelona, Bilbao, Les Palmes de Gran Canaria, Sevilla, Valencia y Valladolid van ser les sedes de la segunda edición del hackathon, que tien previstu axuntar a más de 600 desarrolladores pa construyir aplicaciones tecnolóxiques que resuelvan retos sociales.

La organización plantega a los hackers más d'un centenar de retos que pretenden resolver al traviés de nueves aplicaciones tecnolóxiques cuestiones como crear un mapa colaborativo de competencies y perfiles demandaos poles empreses; desenvolver una aplicación móvil que sollerte en tiempu real sobre la ufierta de determinaos perfiles ufiertaos; construyir un xestor de llistes "to-learn" que facilite'l control de los elementos formativos o'l desenvolvimientu d'un "mobile MOOC". Amás de los retos plantegaos polos organizadores, cualquier persona puede incluyir nueves idees. Los nuevos desenvolvimientos pueden diseñase individualmente o n'equipos multidisciplinares.

L'alcuentru celebrará los díes 3, 4 y 5 d'abril nel Edificiu del Parque Científicu Tecnolóxicu de Xixón. La iniciativa foi promovida por Telefónica, la Fundación Hazloposible y la startup MashmeTV col sofitu de la Rede de Cátedres Telefónica, que va premiar a los equipos que desenvuelvan les meyores aplicaciones tecnolóxiques en dalgún de los siguientes campos: Innovación social, Educación y Empléu.

A lo llargo de los trés xornaes los equipos van trabayar nel desenvolvimientu de les sos aplicaciones y van combinar el so diseñu con alcuentros con un Panel de Mentores compuestu por especialistes na creación de Apps de móvil, networking, etc., que van compartir con ellos los sos conseyos y conocencies.