Investigadores de la Universidá d'Uviéu van collaborar cola empresa asturiana SATEC nel diseñu d'una ferramienta informático que dexe calcular, representar y evaluar la riqueza minera d'Angola. César Castañón, profesor del Departamentu d'Esplotación y Prospección de Mines y miembru del grupu d'investigación de Xeoloxía Aplicada a la Inxeniería, forma parte d'un equipu multidisciplinar que nos próximos meses va desenvolver una aplicación pal Institutu Xeolóxicu d'Angola (IGEO). A pesar de la so riqueza en recursos pervalibles como petróleu o diamantes, la mayor parte del vastu territoriu angoleñu, que casi triplica'l d'España, ye una incógnita dende'l puntu de vista xeolóxicu y mineru.

La Fundación Universidá d'Uviéu (FUO) y l'empresa SATEC suscribieron un contratu pa collaborar nel desenvolvimientu d'una ferramienta opensource pal gobiernu angoleñu que-yos dexe determinar con qué recursos minerales cunten y cuálos son les posibilidaes d'esplotación. El plazu de desenvolvimientu del proyectu de collaboración ye d'un añu.

"Trátase de desenvolver un software que non solamente calcule cuánto mineral hai y ónde ta, sinón que represente en 3D les cantidaes de cada elementu y evalúe les posibilidaes pa esplotalo", esplica'l profesor Castañón. Ye una información estratéxica pal gobiernu angoleñu, yá que podría abrir nueves posibilidaes de desenvolvimientu económicu pal país.

Un equipu multidisciplinar va trabayar nel desenvolvimientu d'un programa que dexe envalorar los recursos xeolóxicos y mineros, que na mayor parte del país son totalmente desconocíos.

Inxenieros de mines, inxenieros informáticos y matemáticos conformen l'equipu encargáu de diseñar el programa informáticu que va procesar y evaluar tola información percanciada nel Plan Nacional de Xeoloxía (PLANAGEO). El gobiernu angoleñu punxo en marcha una inversión cercana a los 300 millones d'euros por que dellos grupos empresariales internacionales, qu'inclúin firmes españoles, percancien la información xeofísica, xeoquímica y cartográfica de too el territoriu. El plazu de desenvolvimientu de PLANAGEO ye de cinco años.

L'aguada formativa

La collaboración ente la Universidá d'Uviéu y l'empresa SATEC va tomar tamién la faceta formativa nos próximos meses. Profesores de la Escuela Técnica Cimera d'Inxenieros de Mines d'Uviéu seríen los encargaos de desenvolver cursos formativos que se desenvolveríen nel país africanu y nes instalaciones de la Universidá d'Uviéu.

Imaxe de portada

Representación en 3D de los sondeos realizaos nun xacimientu mineru.